- अर्थ सरोकार सम्बाददाता
महेन्द्रनगर । एनआइसी एशिया बैंकको एटिएम मेसिन फुटाउने एक जना पक्राउ परेका छन् । भीमदत्त नगरपालिका–४ महेन्द्रनगर बजारको गल्ली नं ५ मा रहेको उक्त बैंकमा जडान गरिएको एटिएम मेसिन तोडफोड गरेको आरोपमा प्रहरीले बिहीबार साँझ वेदकोट नगरपालिका–२ दैजीका १९ वर्षीय नरेन्द्रसिंह ठकुल्लालाई पक्राउ गरेको हो ।
जिल्ला प्रहरी कार्यालय कञ्चनपुरका प्रहरी नायब उपरीक्षक अमरबहादुर थापा क्षेत्रीले उनलाई पक्राउ गरिएको बताएका हुन् । बुधबार राति ८ः३० बजे जाँदा बैंकको एटिएम मेसिन तोडफोड भएको अवस्थामा फेला परेको थियो ।
तत्कालै प्रहरीले बैंकमा जडान गरिएको सिसीटिभी क्यामेरामा कैद भएको फुटेजका आधारमा ठकुल्लालाई पक्राउ गरेको हो । पक्राउ परेका ठकुल्लामाथि प्रहरीले आवश्यक अनुसन्धान गरिरहेको छ ।
