काठमाडौँ । बीमा समितिले उधारोमा बीमा गर्ने/ गराउनेलाई कारवाही गर्ने चेतावनी दिएको छ । समितिले आज एक सूचनामार्फत इजाजत प्राप्त सबै बीमा कम्पनीहरुलाई ऐन विपरित उधारोमा बीमा गर्ने वा गराउनेहरुलाई कानुन बमोजिक कारवाही गर्ने चेतावनी दिएको हो ।
समितिले बीमा ऐन २०४९ को दफ २७ विपरित उधारो बीमा गर्ने वा बीमाशुल्क वापतको रकम बीमकको बैंक खातामा प्राप्त नभइकन बीमालेख जारी गर्ने कार्य नगर्न/ नगराउन बीमा कम्पनीहरुलाई निर्देशनसमेत दिएको छ ।
बीमा ऐन २०४९ को दफा २७ मा ‘कुनै पनि बीमकले कुनै पनि किसिमको बीमा व्यवसाय गर्दा लिइने बीमा वापतको शुल्क रकम प्राप्त नभएसम्म बीमा जोखिम स्वीकार गर्नु हुदैन । बीमकले जोखिम ग्राहक गरे वापत बीमाशुल्क रकम प्राप्त गरेपछि मात्र बीमा गरेको मानिने छ’ भन्ने व्यवस्था उल्लेख छ ।
सोहि अनुसार समितिले बीमाशुल्क रकम सम्बन्धित बीमा कम्पनीको बैंक खातामा आएपछि मात्रै बीमालेख जारी गर्न निर्देशन दिएको हो ।
