">
काठमाडौं । एनएलजी इन्स्योरेन्स कम्पनीले १० प्रतिशत बोनस सेयरको प्रस्ताव पारित गरेको छ । कम्पनीको बिहीबार १५औँ वार्षिक साधारणसभाले १० प्रतिशत बोनस सेयरको प्रस्ताव पारित गरेको हो । सभाले आर्थिक वर्ष २०७६/७७ को लेखापरिक्षण प्रतिवेदनसहितको लेखापरिक्षण गरिएको २०७७ साल असार मसान्तसम्मको वासलात पनि पारित गरेको छ ।
कम्पनीका अध्यक्ष विमल प्रसाद वाग्लेले आर्थिक वर्ष २०७६/७७ सम्मको संचित मुनाफाबाट हाल कायम भएको चुक्ता पूँजी एक अर्ब ९ करोड रुपैयाँको १० प्रतिशतका दरले हुन आउने दश करोड ९६ लाख रुपैयाँ बोनस सेयर वितरण गर्ने र सोमा लाग्ने कर प्रयोजनका लागि आवश्यक ५७ लाख ७० हजार रुपैयाँ नगद लाभांस पारितका लागि प्रस्ताव पेश गरेका थिए ।
उनको प्रस्तावलाई बिहिबार सम्पन्न साधारणसभाले पारित गरेसँगै केहि दिनमा सेयरधनीहरुको खातामा पठाइने कम्पनीले जनाएको छ । कम्पनीले आर्थिक वर्ष २०७६/७७ मा एक अर्ब ८० करोड रुपैयाँ कुल बीमा शुल्क आर्जन गर्नुका साथै २६ करोड २६ लाख रुपैयाँ मुनाफा आर्जन गरेको छ ।
कम्पनीको कुल लगानीमा गत आर्थिक वर्षको तुलनामा ९ प्रतिशतले वृद्धि भई २०७७ साल असार मसान्तमा दुई अर्ब २१ करोड रुपैयाँ पुगेको छ । आर्थिक वर्ष २०७६/७७ मा कम्पनीले कुल कारोबार गत आर्थिक वर्ष २०७५/७६ को तुलनामा ८.०८ प्रतिशतले बृद्धि भई एक अर्ब ९० करोड रुपैयाँ बीमा शुल्क आर्जन गरेको र यसका सबै पोर्टफेलियोमा निरन्तर बृद्धि भैइरहेको अध्यक्ष वाग्लेले सेयरधनीहरुलाई जानकारी गराएका छन् ।
