काठमाडौं । गत आर्थिक वर्षमा श्रम स्वीकृति लिनेको संख्या ६२ प्रतिशतले घटेको छ । राष्ट्र बैंकले गत आर्थिक वर्षको अन्त्यसम्मको आर्थिक तथा वित्तीय स्थिति सार्वजनिक गर्दै यस्तो जनाएको हो ।

राष्ट्र बैंकका अनुसार आर्थिक वर्ष २०७७/७८ मा वैदेशिक रोजगारीका लागि अन्तिम श्रम स्वीकृति (संस्थागत तथा व्यक्तिगत–नयाँ र वैधानिकीकरण) लिने नेपालीको संख्या ६२.८ प्रतिशतले घटेका छन् । अघिल्लो वर्ष यो संख्या २०.५ प्रतिशतले घटेको थियो ।

यता वैदेशिक रोजगारीका लागि पुनः श्रम स्वीकृति लिने नेपालीको संख्या समीक्षा अवधिमा ४६.८ प्रतिशतले घटेको छ । जुन अघिल्लो वर्षमा यो संख्या ३४.७ प्रतिशतले घटेको थियो ।

साथै आर्थिक वर्ष २०७७/७८ मा खुद ट्रान्सफर ९.१ प्रतिशतले वृद्धि भई १०७१ अर्ब ३५ करोड रुपैयाँ पुगेको राष्ट्र बैंकले जनाएको छ ।