काठमाडौं । ङादी ग्रुप पावर लिमिटेडको २० प्रतिशत बोनस सेयर सुरक्षित गर्ने बिहिबार अन्तिम दिन रहेको छ । लाभांश वितरण र साधारणसभाको लागि भदौ १८ गते बुक क्लोज गर्ने भएको छ । त्यसकारण भदौ १७ गतेसम्म नेप्सेमा कारोबार भई कायम सेयरधनीले मात्र लाभांश लिन तथा साधारण सभामा भाग लिन पाउनेछन् ।

कम्पनीले आव २०७७/७८ को नाफाबाट सेयरधनीलाई २० प्रतिशत बोनस सेयर र १ दशमलव ०५ प्रतिशत नगद लाभांश कर प्रयोजनको लागि वितरण गर्ने प्रस्ताव गरेको छ । साथै कम्पनीले २० प्रतिशत बोनस शेयर वितरण पछि कायम चुक्ता पूँजीको २०० प्रतिशत हकप्रद शेयर निष्कासन गर्ने पनि प्रस्ताव गरेको छ । उक्त प्रस्ताव पारित गर्नका लागि कम्पनीले आगामी असोज ३ गते साधारणसभा गर्ने भएको छ । कम्पनीले सभा बिहान ९ बजे क्विन्स क्याफे अनामनगर काठमाडौंमा गर्नेछ ।

सभाको अन्य प्रस्तावमा बझाङ अपर सेती हाइड्रोपावर प्रोजेक्ट ७० दशमलव ४० मेगावाटको सर्वेक्षण अनुमति पत्रको लागि आवेदन दिएको र सो सम्बन्धमा भए गरेका प्रगति विवरणहरु सभालाई जानकारी गराउने र थप आवश्यक कार्यका लागि सञ्चालक समितलाई अख्तियारी दिने प्रस्ताव पनि पारित एजेण्डा रहेको छ । त्यस्तै सभामा अन्य जलविद्युत कम्पनीलाई प्राप्ति गर्ने प्रस्ताव पारित गर्ने र सो सम्बन्धि सम्पूर्ण कार्य गर्नका लागि सञ्चालक समितलाई अख्तियारी दिने, कम्पनीको प्रबन्धपत्र तथा नियमावीमा संशोधन गर्ने प्रस्ताव रहेको छ ।