काठमाडौँ । अहिले कुमारी बैंकको किर्ते काण्ड सतहमा छ । गायक योगेश्वर अमात्यको जग्गाको नक्कली लालपूर्जा लगायतका डकुमेन्ट बनाई भू-माफियाहरुले सो उपर १९ करोड ऋण लिएको भेटिएपछी अहिले सीआइबीले ऋणी, बैंकका कर्मचारी र जग्गाको मूल्यांकनकर्तालाई पक्राउ गरी अनुसन्धान गरिरहेको छ । कुसन प्रधानको अगुवाईमा, बैंककै कामु सीइओ अनुजमणि तिमिल्सीनाको मिलेमतोमा सो जग्गाउपर १९ करोड ऋण दिएको आरोप यतिबेला लागेको छ र प्रहरीले कुसन प्रधान लगायतका ऋणीलाई पक्राउ गरेर यसको अनुसन्धान गरिरहेको छ भने राजनीतिक दबाबमा बैंकका सीइओ अनुजमणि तिमिल्सीनालाई पक्राउ नै नगरी यस प्रकरणमा थप अनुसन्धान गरिरहेको छ । यो प्रकरणमा बैंकका कनिष्ट कर्मचारी सोनु ठाकुरपनि समातिएका छन् । बैंकमा भर्खर जागिर खान आएका ठाकुरको दिन बिग्रेको भनौं वा माफियाहरुको चंगुलमा उनी ‘शहिद’ भए भनौं, उनी यो प्रकरणमा नमज्जासँग फसेका छन् ।
मालपोत पुगेको त्यो दिन…’यो माथिको फाइल हो, छिट्टो काम सकेर आउनु…’
ब्रान्च मेनेजरले सोनु ठाकुरलाई अर्हाए । ठाकुरको काम थियो मालपोतमा बैंकको प्रतिनिधिको रुपमा हस्ताक्षर गर्ने । ब्रान्च मेनेजरले पहिला नै ‘यो माथिको फाइल हो, छिटो सक्नुपर्छ’ भनेका थिए । र सोनु त्यो दिन बैंकको प्रतिनिधि बनेर मालपोत कार्यालय पुगे ।
कार्यालय पुग्दा कुसन प्रधानको समूहले उल्टै ‘काम सकियो अव यहाँ हस्ताक्षर मात्र गर्न बाँकी छ’ भनेर अर्हाए । ठाकुरले पनि ‘ए काम सकीइसकेछ, भनेर आवश्यक कागजात हेरे । कागजातमा मालपोतका हाकिमको समेत हस्ताक्षर थियो । सबै कागजहरु तयार थिए । सबै कुरा तयार भएपछी उनले पनि बैंकको प्रतिनिधि बनेर सो कागजमा हस्ताक्षर गरिदिए । तर सो कागजमा सक्कली भनेको सोनु ठाकुरको हस्ताक्षरमात्र थियो । अरु सबै नक्कली । मालपोतको कागजदेखि लालपूर्जासम्म, सबै नक्कली थिए । रोक्काका कागजहरु सबै नक्कली थिए । तर ती कागजहरु सक्कली हुन् कि नक्कली भन्ने सोनु ठाकुरले थाहा पाउने कुरै भएन । र उनी आफ्ना ब्रान्च मेनेजरले अर्हाएको काम गरेर फर्किए ।
‘कुनै दिन फसीहालियो भने ठाकुरलाई नै फसाउने हो’ भनेर माफियाहरुले तयारी गरिसकेका थिए । यो कुराको भेउ उनले पाउने कुरै भएन । त्यसको केहि समयपछी यो प्रकरण सतहमा आयो । उनी समातिए । जवकी उनको यसमा गल्ती केहि पनि थिएन । सीइओको फाइल भनेपछी एउटा जुनियर कर्मचारी यसै पनि थरथर हुन्छ । यो केसमा पनि माथिको फाइल भनेपछि उनले बाँकी चेकजांच गर्ने कुरै पनि भएन । त्यसमाथि सबै कागज सक्कलीजस्ता थिए । यो कागज सक्कली नै हो र ? भनेर चेकजाँच गर्ने भन्ने कुरा हुँदैनथ्यो । उनको हैसियत पनि त्यसरी सोध्ने खालेको थिएन । अन्तत: उनले सहि गरिदिएकै कारण उनी फसे । अहिले बैंकका (अहिले बिदामा बसेका) डेपुटी सीइओ मनिस तिमिल्सीना भने मालपोतको जिम्मेवारी पूरा नगरेकाले दोष ठाकुरकै भएको बताउँदै हिंडेका छन् । अर्थ सरोकारसँगको कुराकानीमा पनि उनले त्यसै भने । तर खासमा सबै मिलेमतो माथिको थियो । सोनु ठाकुर फोकटमा फसे ।
भर्खर सुरु भएको थियो करियर, अव बर्बाद हुने डर !
यसो त ठाकुरको आफ्नो भन्ने कोहि थिएन बैंकिङमा । सार्है मेहेनत गरेर बैंकको जागिर सुरु गरेका थिए । केहि महिनामात्र भएको थियो कुमारी बैंकमा जागिर खाएको । यो प्रकरण सतहमा आएपछि ब्रान्च मेनेजर फरार छन् । उनलाई बैंककै कामु सीइओ (हाल बिदामा बसेका)ले भगाएको चर्चा पनि छ । तर ब्रान्च मेनेजरलाई प्रहरीले पक्राउ गर्छ भनेर भगाउने बैंकले सोनु ठाकुरलाई फसायो । अझ आफ्नो कर्मचारीलाई माफियाहरुले फसाए भनेर बैंकले जोगाउनुपर्ने थियो । तर बैंककै डेपुटी सीइओ मनिस तिमिल्सीना उनी नै दोषी हुन् भन्दै हिंडे । सोनु ठाकुर सामान्य परिवारका व्यक्ति हुन् । उनका लागि केहि हजारको जागिर ठुलो सपना हो । यहि सपनामा रुमलिएर उनी जागिर गर्दै थिए । तर अन्तत उनी समातिए । उनी समातिदा पनि उनले के गल्ती गरेका थिए भन्ने उनलाई थाहा थिएन । पछी प्रहरीले सोधखोज गरेपछि पो बल्ल उनले आफुले हस्ताक्षर गरेको कागज किर्ते रहेछ भनेर थाहा पाए । अहिले उनी हिरासतमा छन् । उनीमाथि किर्ते मुद्धा चलाउने तयारी छ । उनी समातिएपछी उनको परिवार सार्है ठुलो समस्यामा छ । नखाएको बिष लागेपछी परिवारलाई ठुलो पीडा भएको छ ।
‘दुश्मनले पनि नखाओस् कुमारी बैंकको जागिर !’
अहिले उनका नजिकका साथीहरु यो प्रकरणबाट विछिप्त छन् । ‘दुश्मनले पनि कुमारी बैंकको जागिर नखाओस् । यो त हामीजस्ता सानालाई फसाएर ठुलाले राज गर्ने बैंक रहेछ ।’ सोनु ठाकुरको गाउँमा भेटिएका उनका एक साथी भन्छन्, ‘सोनुले कति करोड खायो भनेर चर्चा सुरु गरेका छन् नबुझेकाहरुले । तर जो, केहि हजारको जागिरका लागि मरीमेट्ने मान्छे हो, उसको त्यो हैसियत नै हुँदैन भन्ने धेरैले बुझेका छैनन् । अव उनलाई अरु बैंकमा जागिर खान पनि समस्या हुने देखिएको छ । उनको करियर कुमारीले बर्बाद बनाईदियो । कुमारी बैंककै मिलेमतोमा भएको ठुलो प्रकरणमा उनलाई फसाइयो ।’ यता बैंकका घटनाका मुख्य योजनाकारका साथी अनुजमणि तिमिल्सीना भने यो प्रकरणमा ठाकुरलाई जेलबाट छिट्टै छुटाउने प्रतिबद्धता व्यक्त गरिरहेका छन् । ‘हामीले सोध्दा सीइओले हामी छुटाउँछौं भनिरहेका छन् । जो जेल जानुपर्ने थियो, उसले हामी सहयोग गर्छौं भन्दा पनि ‘लौ न हजुर’ भन्नुपर्ने स्थिति आएको छ ।’ उनका एक आफन्तले अर्थ सरोकार डटकमसँग भने, ‘जे भयो गलत भयो ।’
