">
काठमाडौं । अख्तियार दुरुपयोग अनुसन्धान आयोगमा पुनर्बीमा सम्बन्धी नयाँ निर्देशनविरुद्ध उजुरी दर्ता भएको छ । पुनर्बीमा कम्पनीले लिखित रुपले अस्विकृत गरेको पुनर्बीमा मात्रै विदेशी कम्पनीलाई दिन सकिने बीमा समितिको निर्णयविरुद्ध अख्तियारमा दुई जनाले मंसिर २२ गते उजुरी दर्ता गराएका हुन् । आयोगले सो उजुरी दर्ता नम्बर सी–०१८५११ मा दर्ता भएको जनाएको छ । ‘बीमा समितिको सञ्चालक समिति बैठकको माईन्युट किर्ते गरिएकोले छानविन गरि कारवाही गरिपाउँ’ भन्दै दुई जनाले सो उजुरीमार्फत माग गरेका छन् ।
पुनर्बीमा सम्बन्धी नयाँ निर्देशनको सम्बन्धमा गरिएको निर्णयमा बीमा समितिका अध्यक्ष, सञ्चालक समिति, अर्थमन्त्री जनार्दन शर्मा र अर्थ सचिव मधुकुमार मरासीनीको मिलेमत्तो रहेको उनीहरुको भनाई छ । यस्तै सबै पुनर्बीमा नेपाली कम्पनीमै गर्नुपर्ने निर्णयले हिमालयन रिइन्स्योरेन्स कम्पनीका लागि ६ अर्बको व्यवसाय सुनिश्चित गरिदिएको बताउँदै उजुरीकर्ताले सो निर्णयले आर्थिक अपचलन भएको दाबीसमेत गरेका छन् ।
उनीहरुले बीमा समितिका अध्यक्ष सुर्य प्रसाद सिलवाल, सञ्चालक समिति, अर्थमन्त्री जनार्दन शर्मा र सचिव मधुकुमार मरासीनीको पनि संलग्न रहेको उजुरीमा उल्लेख गरेका छन् । संलग्नलाई तत्कालै पक्राउ गरी कारवाही प्रक्रिया अघि बढाउन उजुरीकर्ताहरुले माग गरेका छन् ।
समितिका अध्यक्ष सिलवालले हिमालयन रिलाई व्यवसाय सुनिश्चित गरिदिने उदेश्यले सञ्चालक समितिको माइन्युट नै किर्ते गरेको दाबीसमेत उजुरीकर्ताले गरेका छन् । उजुरीमा बीमा समिति सञ्चालक समितिको माइन्युट र समितिमा जडान गरिएका सीसी क्यामेराहरुका फुटेजहरुको अध्ययन गरी कारवाही गर्न आग्रह गरेका हुन् ।
यसो त हिमालयन रि लाइसेन्स प्रकरणदेखि नै विवादमा पर्दै आएको थियो । सुनियोजीत रुपमा हिमालयनलाई लाइसेन्स दिएको भन्दै केहि समयअघि तत्कालिन विपक्षी मोर्चामा आवद्ध र हाल सत्तारुढ गठबन्धनमा आवद्ध पाँच विद्यार्थी संगठनहरुले पनि अख्तियारमा लिखित उजुरी हालेका थिए ।
