जुम्ला । सिटिजन्स बैंकको जुम्लास्थित शाखाको बाथरूममा बेहोस भएकी नर्सको अस्पतालमा मृत्यु भएको छ । कर्णाली स्वास्थ्य विज्ञान प्रतिष्ठान शिक्षण अस्पतालमा कार्यरत स्टाफ नर्स अनुपमा श्रेष्ठको सोहि अस्पतालमा उपचारका क्रममा शुक्रबार निधन भएको हो ।
जिल्ला प्रहरी कार्यालयका सुचना अधिकारी तथा प्रहरी निरीक्षक युवन चौधरीका अनुसार कोहलपुर उपमहानगरपालिका बाँकेकी २६ वर्षीया श्रेष्ठ कर्णाली प्रतिष्ठानमा कार्यरत थिइन् । बिहिबार दिउँसो बैंकको बाथरूममा वेहोस भएको अवस्थामा श्रेष्ठ भेटिएपछि कर्णाली प्रतिष्ठानमा उपचारका लागि लगिएको थियो ।
सो घटनाको थप अनुसन्धान भइरहेको र आफन्तसमेत जुम्ला आइपुगेको प्रहरीले जनाएको छ । कर्णाली प्रतिष्ठानका प्रवक्ता तथा डीन डाक्टर रमेश भट्टटराईले बेहोस अवस्थामा ल्याइएको र पछि मुटुको धड्कन फिर्ता आएको थियो । यता उनलाई आइसियुमा राखेर उपचार गरिएको भएपनि बचाउन नसकिएको चिकित्सकहरु बताउँछन् । २४ घण्टासम्म आइसियुमा राख्दा पनि होसमा आउन नसकेपछि चिकित्सकको टोलीले शुक्रबार साँझ मृत घोषणा गरेको थियो।
यता बैंकका म्यानेजर महेश शाहीले श्रेष्ठ साथीको बहिनी भएकी र लामो समयदेखि चिनजान भएकाले बिहिबार बैंकमा आएका बेला बाथरूममा पसेको बताएका छन् । पछि बेहोस भएर ढलेकी र ढोका फोडेर अस्पताल पुर्याइएको उनले बताए । उनले दिउँसो आफूहरु अफिसमै भएको समयमा घटना भएको जानकारी दिए । सो बेला बैंकमा गार्ड, कस्टमर र अन्य कर्मचारी पनि बैंकमै रहेकोसमेत बताए ।
जिल्ला प्रहरी कार्यालय जुम्लाका प्रहरी नायब उपरीक्षक नरेन्द्र चन्दले प्रहरीले कानुनी प्रक्रिया पूरा गरेर अनुसन्धान अघि बढाउने बताए । कर्णाली स्वास्थ्य विज्ञान प्रतिष्ठान शिक्षण अस्पताल जुम्लाका उपकुलपति डा. मंगल रावलले कर्णाली अस्पतालले एक जना होनाहार स्वास्थ्यकर्मी गुमाएको भन्दै दुःख व्यक्त गरेका छन्।
