काठमाडौँ । नेपाल राष्ट्र बैंकले चालु आर्थिक वर्षको चार महिनामा देशको शोधनान्तर स्थिति एक खर्ब ५० अर्ब ३८ करोड रुपैयाँ घाटामा रहेको जनाएको छ । राष्ट्र बैंकले बुधबार कात्तिक महिनाको आर्थिक तथा वित्तीय स्थिति प्रतिवेदन सार्वजनिक गर्दै यस्तो जनाएको हो । गत आर्थिक वर्षको सोही अवधिमा शोधनान्तर स्थिति ११० अर्ब ६५ करोड रुपैयाँले बचतमा थियो ।

चालु आर्थिक वर्षको कात्तिक महिनामा मात्र शोधनान्तर घाटा ७४ अर्ब २४ करोड रुपैयाँ थपिएको छ । चालु आर्थिक वर्षको अजोजसम्ममा शोधनान्तर स्थिति ७६ अर्ब १४ करोडले घाटामा थियो । तर, कात्तिक महिनामा मात्रै पहिलो त्रैमासको कुल घाटा जति नै नोक्सानी थप भएको हो ।

यस्तै अमेरिकी डलरमा अघिल्लो वर्षको सोही अवधिमा ९३ करोड १७ लाखले बचतमा रहेको शोधनान्तर स्थिति समीक्षा अवधिमा १ अर्ब २६ करोडले घाटामा रहेको छ । चालु आवको चार महनामा चालु खाता २२३ अर्ब १९ करोडले घाटामा रहेको छ । गत आवको सोही अवधिमा अवधिमा चालु खाता १९ अर्ब १ करोडले बचतमा रहेको थियो ।

अमेरिकी डलरमा अघिल्लो वर्षको सोही अवधिमा १५ करोड ८६ लाखले बचतमा रहेको चालु खाता समीक्षा अवधिमा १ अर्ब ८८ करोडले घाटामा रहेको छ ।