काठमाडौं । एनएमबि बैंक लिमिटेडले लाभांश प्रस्ताव पारित गर्न वार्षिक साधारणसभाको मिति तय गरेको छ । बैंकले पुस २२ गते त्रिभुवन आर्मी अफिसर्स क्लब, टुँडिखेल काठमाडौंमा बिहान १०ः३० बजे वार्षिक साधारणसभा बोलाएको हो ।

सभामा गत आर्थिक वर्षको नाफाबाट १२.५% बोनस सेयर र करसहित ३.३% नगद गरी कुल १५.८% लाभांश वितरण गर्ने प्रस्ताव लैजानेछ । जसका लागि बैंकले बुधबार (पुस ७ गते) बुक क्लोज गर्ने भएको छ ।  जस अनुसार प्रस्तावित लाभांश पाउन र सभामा भाग लिन मंगलबारसम्म सेयरधनी बन्नुपर्नेछ ।

साथै बैंकको जारी पूँजी १६ अर्ब ३२ करोड रुपैयाँबाट बढाएर १८ अर्ब ३६ करोड रुपैयाँ पुर्याउने एजेन्डा पनि सभामा राखेको छ । बोनस वितरणपछि चुक्ता पूँजी वृद्धि हुने भएकाले सोही अनुसार प्रबन्धपत्र तथा नियमावली संशोधन गर्ने प्रस्ताव पनि पेश हुनेछ । आर्थिक वर्ष २०७७/७८ को वार्षिक प्रतिवेदन, नाफा–नोक्सान हिसाब तथा नगद प्रवाह विवरणमा पनि छलफल गरी पारित गर्ने प्रस्ताव छ ।