काठमाडौं । नेपाल राष्ट्र बैंकले १३ वाणिज्य बैंकलाई कारवाही गरेको छ । राष्ट्र बैंकले वार्षिक कार्ययोजना अनुसार गर्ने फिल्ड सुपरिवेक्षणको क्रममा निर्देशको विपरित गएर कारोबार गर्ने वाणिज्य बैंकहरुलाई चालु आर्थिक वर्षको पहिलो त्रैमासमा कारवाही गरेको हो ।
प्रिमियम दर बढाउनेदेखि धितो लिलामीका विभिन्न गुनासो तथा उजुरी आएपछि बैंकमा विषेश निगरानी बढाइएको थियो । पहिलो त्रैमासमा राष्ट्र बैंकले विषेश गरी कृत्रिम विदेशी निक्षेप देखाएर कारोबार गर्ने वाणिज्य बैंकहरुलाई लिखित स्पष्टिकरण सोधेरसमेत सचेत गराएको स्रोतले जनाएको छ ।
बैंकहरुले कर्जा–निक्षेप अनुपात (सीडी रेसियो) ९० प्रतिशत कायम गरी व्यवसाय गर्न विदेशी मुद्राको कृत्रिम निक्षेप देखाएका थिए । नियमित फिल्ड सुपरिवेक्षण र विषेश निगरानीको क्रममा असोज मसान्तसम्म १३ वटा वाणिज्य बैंक कारवाहीमा परेका हुन् ।
राष्ट्र बैंक वाणिज्य बैंक सुपरिवेक्षणले वार्षिक कार्ययोजना अनुसार चालु आवमा ९ वटा वाणिज्य बैंकको फिल्ड अनुगमन तथा निगरानी पुरा गरिसकेको छ भने ४ वटा चरणमा रहेको छ । यस्तै वार्षिक कार्ययोजना बाहेकसमेत राष्ट्र बैंकले उजुरी तथा गुनासोको आधारमा विषेश निगरानी बैंकमा आफ्नो टोली पठाएर गर्छ ।
कृत्रिम विदेशी निक्षेपका देखाएका कारण १३ वटा वाणिज्य बैंक र ७ वटा बैंक ब्याजदरको कारण परेका छन् । यी मध्ये अधिकांश बैंक दोहोरो कारवाहीमा परेका हुन् ।
