">
काठमाडौँ । सामाजिक सञ्जालमा आम लगानीकर्ताका आदर्श पात्र बनेका शिव चन्द्र डोनले नेकपा (माओवादी केन्द्र)का अध्यक्ष पुष्पकमल दाहाल प्रचण्डले पूँजीबजारविरुद्द दिएको अभिव्यक्तिप्रति प्रश्न गरेका छन् । उनले सामाजिक सञ्जाल फेसबुकमा एक स्ट्याटस लेख्दै प्रचण्डलाई पूँजीबजारको लगानी अनुत्पादक भए लुटेर, ठगेर, ढाँटेर, भ्रष्टाचार गरेर कमाएको चाहिं उत्पादक हो त कमरेड भनि प्रश्न गरेका हुन् । यदि त्यसो हो भने पूँजीबजार बन्द गरेर २५ लाख लगानीकर्तालाई जंगल पठाएर गुरिल्ला तालिम दिन पनि उनले स्ट्याटसमा लेखेका छन् ।
यस्तो छ उनको स्ट्याटस :
‘पुँजीबजारको लगानी अनुत्पादक भए लुटेर, ठगेर, ढाँटेर, भ्रष्टाचार गरेर कमाएको चाहिं उत्पादक हो त कमरेड ? यदि त्यसो हो भने पुँजीबजार बन्द गरेर २५ लाख लगानीकर्तालाई जंगल पठाएर गुरिल्ला तालिम दिनु पर्यो !’
अध्यक्ष पुष्पकमल दाहाल प्रचण्डले शनिवार माओवादी केन्द्रकै कार्यक्रममा पछिल्लो समय पूँजीको लगानी उद्योग र उत्पादनका क्षेत्रमा हुन छाडेर पुँजी बजारमा लगानी हुनु साम्राज्यवादको विकसित रुप भएको बताएका थिए । माओ र लेनिनको पालामा पूँजीको परिचालन यसरी नभएको बताए । ‘माओ र लेनिनको पालामा पूँजीको परिचालन यसरी हुने गर्दैनथ्यो त्यसैले उहाँहरुले यो कुरालाई विस्तृत देख्न पाउनुभएन’ उनले भने ‘अब हाम्रो काँधमा कसरी पूँजीबादलाई भण्डाफोर गर्ने भन्ने जिम्मेवारी आयो ।’
