">
काठमाडौं । चालु आर्थिक वर्षको दोस्रो त्रैमाससम्म आइपुग्दा अरुण भ्याली हाइड्रोपावरले ७ करोड ४९ लाख रुपैयाँ खुद नाफा कमाएको छ । यो नाफा गत वर्षको भन्दा १०.१०% धेरै हो । गत वर्ष यसले ६ करोड ८० लाख रुपैयाँ नाफा कमाएको थियो ।
कम्पनीको अन्य श्रोतबाट हुने आम्दानी पनि ६ करोड ५३ लाख रुपैयाँबाट बढेर ७ करोड १८ लाख पुगेको छ । यसले गर्दा नाफा वृद्धि गर्न सहयोग पुगेको देखिन्छ । यस्तै, कम्पनीको विद्युत बिक्रीबाट प्राप्त हुने आम्दानी पनि ३२.३१% ले बढेर ४ करोड २ लाख रुपैयाँ कायम भएको छ । गत वर्ष यसले विद्युत बिक्रीबाट ३ करोड ४ लाख रुपैयाँ आम्दानी गरेको थियो ।
हाल अरुण भ्यालीको चुक्ता पुँजी १ अर्ब ७२ करोड रुपैयाँ रहेको छ भने जगेडा कोषमा १३ करोड ५२ लाख रुपैयाँ छ । प्रतिसेयर आम्दानी ८ रुपैयाँ ६६ पैसा रहेको यसको प्रतिसेयर नेटवर्थ १०७ रुपैयाँ ८२ पैसा छ ।
