काठमाडौँ । प्रवेशिका परीक्षा सकेर कलेज दैनिकीमा प्रवेश गर्ने बित्तिकै आजकलका धेरै किशोर किशोरीहरुफुरमास खर्च र भड्किलो हाउभाउमा उत्रन्छन् । बाउआमाको दुख नबुझ्नेहरु, आफ्नो जीवन नै बुझ्न चाहाँदैनन । कलेजको पढाईसँगै धेरै किशोर किशोरीहरु देखासिखिमा उत्रन्छन् । बाउ आमाको कमाईमै महँगो फोन, आवश्यक नहुँदा पनि सवारी साधन धेरैको मोहको विषय हुनेगर्छ ।

तर सबैको कथा कहाँ यस्तो हुन्छ र रु पैसाको महत्व बुझ्नेहरुको पारानै बेग्लै हुन्छ । बा आमाको कमाईको यथार्थ बुझेकाहरुको जीवन जिउने कला नै फरक हुन्छ । र त पढाईसँगै धेरै किशोर किशोरी, युवा युवतीहरु साइड जबको मीठो यात्रामा निस्किन्छन् । जागिर नपाएकाहरु वा सेयर बजारको सुन्दरता बुझेकाहरु यहि बजारमा प्रवेश गर्छन् । र आज हामी यहि सुन्दर सेयर बजारमा आफ्नो कलेज दैनीकी देखि लागेकी एक चेलीको सुन्दर बजार कथा सुनाउँदैछौ । र बुझाउँदैछौँ सेयर बजार सुन्दर छ ।

उमेरले कलिली छिन् प्रविना । तर यो कलिलो उमेरमै पनि उनले सहपाठीहरुभन्दा फरक र गहिरोसँग सेयर बजार बुझेकी छिन् । लाख होइन, हजारकोमात्रै पनि महत्व बुझेकी प्रविनालाई त्यही हजारको इन्ट्रीले सेयर बजारमा सफल यात्रातर्फ लम्काउँदैछ । र यो कथा आइपिओबाट बजार प्रवेश गर्ने जो कोहिका लागि प्रेरणादायी हुनसक्छ । किनकी सेयर बजार सुन्दर छ ।