काठमाडौं । सांग्रिला डेभलपमेन्ट बैंकले चालु आर्थिक वर्षको दोस्रो त्रैमासको वित्तीय विवरण सार्वजनिक गर्दै खुद नाफा २६ करोड २८ लाख रुपैयाँ कमाएको जनाएको छ । बैंकको यो नाफा गत वर्षको भन्दा ५९.४७% ले धेरै हो । गत वर्ष बैंकले १६ करोड ४८ लाख रुपैयाँ खुद नाफा कमाएको थियो ।

सार्वजनिक वित्तीय विवरण अनुसार पुस मसान्तसम्म आइपुग्दा बैंकको खुद ब्याज आम्दानी र सञ्चालन नाफा दुवै बढेको छ । बैंकले खुद ब्याज आम्दानी र सञ्चालन नाफा क्रमशः ४६.८१% र ६८.१६% ले बढेको जनाएको हो । यस्तै पुस मसान्तसम्म आउँदा बैंकको वितरणयोग्य नाफा पनि ११८.७०% ले बढेर १८ करोड रुपैयाँ पुगेको छ ।

बैंकको निक्षेप संकलन र कर्जा लगानी क्रमशः ९.८८% र २२.४४% ले बढेको छ । बैंकको प्रतिसेयर आम्दानी ४ रुपैयाँ ७४ पैसाले बढेर १७ रुपैयाँ ३९ पैसा भएको छ भने प्रतिसेयर नेटवर्थ १३० रुपैयाँ ९७ पैसा रहेको छ ।