काठमाडौं । रकम हिनामिनाको घटनापछि चरम विवादमा तानिएको सप्तकोशी डेभलपमेन्ट बैंकले कामु (कायम मुकायम) प्रमुख कार्यकारी अधिकृतको जिम्मेवारी कुमार खड्कालाई दिएको छ । बैंकको रेमिट्यान्स शाखाको पार्किङ एकाउन्टबाट पछिल्लो ६ वर्षमा झन्डै १६ करोड रुपैयाँ रकम घोटाला भएपछि बैंकका सीइओसहित अन्य कर्मचारी पक्राउ परेपछि उनलाई कामु सीइओको जिम्मेवारी दिईएको हो ।
बैंकको पुस २० गते बसेको सञ्चालक समितिको बैठकले अर्को व्यवस्था नहुञ्जेलसम्मका लागि कामु प्रमुख कार्यकारी अधिकृतको जिम्मेवारी खड्कालाई दिएको नेप्सेमार्फत जानकारी गराएको हो । सोहि बैठकले उनलाई कम्पनी सचिवकोसमेत जिम्मा दिएको छ ।
यता बैंकले सीइओ नविन सुवेदीलाई बर्खास्त गरिसकेको छ भने अनिसहित संलग्न अन्य कर्मचारीहरुमाथि प्रहरीले अनुसन्धान गरिरहेको छ । सुवेदीको मिलेमतोमा बैंकमा सो घोटाला भएको पाइएको थियो । बैंकबाट घोटाला भएको रकममध्ये अधिकांस रकम सुवेदीको नातामा बहिनी पर्ने बबिताको खातामा पठाएको पाइएको छ । १४ करोड रुपैयाँ बबिता सुवेदीको खातामा पठाएको पाइएको छ ।
