बागलुङ । बागलुङको पर्यटन प्रवद्र्धनका लागि यहाँका युवाले प्रसिद्ध पर्यटकीय क्षेत्र पञ्चकोटदेखि काठेखोला गाउँपालिकाको बेलढङ्गासम्म पदयात्रा गरेका छन् । कोरोना भाइरस सङ्क्रमणको जोखिमका कारण सुस्ताएको पर्यटन व्यवसायको प्रवद्र्धन गर्ने उद्देश्यले सामाजिक विकासका क्षेत्रमा काम गर्दै आएका १२ युवाको समूहले दुई दिने पदयात्रा सुरु गरेका हुन् ।

बागलुङ नगरपालिका–६ पञ्चकोटबाट शनिबार सुरु भएको यात्रा आज काठेखोला गाउँपालिका–३ को बेलढङ्गामा पुगेर सकिने यात्रामा सहभागी प्रेम केसीले बताउनुभयो । पञ्चकोट–बेलढुङ्गा पदमार्गमा पर्ने संसारकोट, थाप्ले, गुनगुनेको धुरी, दारेगौँडालगायतका पर्यटकीय क्षेत्रको प्रचारप्रसार र प्रवद्र्धनका लागि पदयात्रा गरिएको उहाँको भनाइ छ ।

काठेखोला गाउँपालिका–२ भीमापोखरामा रहेको पुष्पाञ्जलि ग्रामीण विकास केन्द्रले शिवरात्रिको अवसर पारेर पद्यात्राको आयोजना गरेको थियो । बागलुङ नगरपालिका र काठेखोला गाउँपालिकाका पर्यटकीय क्षेत्र समेटिएको पञ्चकोट–बेलढुङ्गा पदमार्गको प्रचारका लागि पदयात्रा गराइएको केन्द्रका अध्यक्ष विक्रम शर्माले बताउनुभयो ।

केन्द्रले गतवर्ष थाप्लेको धुरीमा सात देशका झण्डा राखेर पर्यटकलाई निम्ता दिएको थियो । -रासस