काठमाडौं । वाणिज्य बैंकहरुले माघ महिनामा मात्रै घरजग्गामा ४१ करोड ६० लाख रुपैयाँ ऋण दिएका छन् । नेपाल राष्ट्र बैंकले चालू आर्थिक वर्ष २०७८/७९ को माघमा मात्र वाणिज्य बैंकहरुले घरजग्गामा सो बराबरको ऋण दिएका हुन् । उक्त महिनामा २७ वाणिज्य बैंकमध्ये १६ वटाले घरजग्गामा ऋण प्रवाह बढाएका छन् भने बाँकी ११ वटाले घटाएका छन् ।
नेपाल बैंक, नेपाल बङ्गलादेश बैंक, कुमारी, नेपाल इन्भेष्टमेन्ट, बैंक अफ काठमाडू, एनसीसी बैंक, सिद्धार्थ ग्लोबल आइएमई, सनराइज, मेगा र सेन्चुरी कमर्शियल बैंकले घरजग्गामा ऋण घटाएको राष्ट्र बैंकले जनाएको छ । हालसम्म वाणिज्य बैंकबाट यस्तो ऋण १ खर्ब ८१ अर्ब २० करोड रुपैयाँ प्रवाह भएको छ ।
जसमा सबैभन्दा बढी ऋण प्रवाह एनआईसी एशिया बैंकले गरेको छ । माघसम्म बैंकले घरजग्गामा ऋण प्रवाह १५ अर्ब ३८ करोड रुपैयाँ भएको छ । माघमा मात्रै भने बैंकले १० करोड ३० लाख रुपैयाँ घरजग्गामा ऋण प्रवाह गरेको छ । यद्यपि माघमा सबैभन्दा बढी घरजग्गामा ऋण प्रवाह सिभिल बैंकले गरेको छ । बैंकले माघमा मात्र ७० करोड ७० लाख रुपैयाँ यस्तो ऋण प्रवाह गरेको छ ।
