काठमाडौँ । नेपाली लेखाव्यवसायीहरुको नियमनकारी निकाय नेपाल चार्टर्ड एकाउन्टेन्टस संस्था (आइक्यान) ले यहि बैसाखमा लेखाव्यवसायीहरुको राष्ट्रिय सम्मेलन गर्ने भएको छ । आइक्यानको २५औँ बर्षगाँठको अवसरमा संस्थाले यस्तो सम्मेलनको आयोजना गर्न लागेको हो । सो सम्मेलनमा देशभरका लेखाव्यवसायीहरु एक ठाउँमा सहभागी हुनेछन् भने सो सम्मेलनमा आइक्यानका सरोकारवालाहरुसँग पनि विशेष बहस हुनेछ ।
‘अहिले कार्यक्रमको खाकाबारे तयारी गरिरहेका छौं । सम्भवत यहि बैसाखमै गर्नेगरी कार्यक्रमको तयारी भईरहेको छ । आइक्यानको २५ औँ बर्षगाँठको अवसरमा आइक्यानले गर्ने यो सबैभन्दा ठुलो सम्मेलन हुनेछ । यो कार्यक्रमलाई भव्य र ऐतिहासिक बनाउनका लागि के कसो गर्न सकिन्छ भन्ने विषयमा हामी तयारीमा जुटिसकेका छौं ।’आइक्यान अध्यक्ष सिए युद्धराज ओलीले भने- ‘कार्यक्रम अहिलेसम्मकै ऐतिहासिक बनाउनेगरी काम सुरु भईसकेको छ । सो सम्मेलनले सिए तथा आरएहरुलाई एक ठाउँ ल्याउनेमात्र काम गर्ने छैन, बरु देशभरका सरोकारवालाहरुलाई आइक्यान, सिए, आर र हाम्रो भूमिकाबारे बुझाउनेछ ।
आइक्यानले २५ औँ बर्षगांठको अवसरमा विभिन्न कार्यक्रमहरु आयोजना गरिरहेको छ । यसअघि कोरोना महामारीका कारण रोकिएका कामहरु पनि कोरोना महामारी कम भएसँगै आइक्यान सक्रिय भएर गरिरहेको छ । यसैबीच आइक्यानले कोरोनाका कारण रोकिएको कन्भोकेसनदेखि अन्य कार्यक्रमहरु पनि छिट्टै आयोजना गर्ने तयारी गरेको छ । साथै आइक्यानले विभिन्न प्रादेशिक स्तरमा पनि कार्यक्रमहरु आयोजना गरिरहेको छ ।
