">
काठमाडौं । एनआईसी एशिया बैंकको २४औं वार्षिक साधारणसभामा मंगलबारसम्म कायम सेयरधनीले भाग लिन पाउने भएका छन् । कम्पनीले सभाको लागि चैत ८ गतेदेखि २० गतेसम्म बुक क्लोज गर्ने भएकाले मंगलबारसम्म कायम सेयरधनीले सभामा भाग लिन सक्नेछन् । कम्पनीले लाभांश विनानै सभा डाकेको हो । जस अनुसार कम्पनीका सेयरधनीले यस वर्ष लाभांश नपाउने भएका छन् ।
कम्पनीले गत आवको मुनाफाबाट सेयरधनीलाई १५ प्रतिशत बोनस सेयर र शून्य दशलमव ७९ प्रतिशत नगद लाभांश वितरण गर्ने प्रस्ताव गरी नेपाल राष्ट्र बैंकसँग स्वीकृती मागेको थियो । तर कम्पनीले उच्च कर्जा विस्तार गरेका कारण क्यापिटल कन्जरभेसन बफर नदेखिएको भन्दै राष्ट्र बैंकले लाभांश वितरणमा रोक लगाएपछि कम्पनीको लाभांश रद्द भएको छ ।
सभाले आव २०७७/ ७८ को वार्षिक प्रतिवेदन छलफल गरी पारित गर्ने , आव २०७८/ ७९ को लागि लेखापरिक्षकको नियुक्ती गर्ने र निजको पारिश्रमिक निर्धारण गर्ने प्रस्ताव पनि पारित गर्नेछ । कम्पनीले सभा चैत २० गते आर्मी अफिसर्स क्लब भद्रकाली काठमाडौंमा बिहान ९ बजे बोलाएको छ ।
