काठमाडौं । नेपाल राष्ट्र बैंकले बैंकरहरुलाई अत्यावश्यक बाहेकका वस्तु आयातका लागि एलसी खोल्न बन्द गर्न निर्देशन दिएपछि अर्थमन्त्री जनार्दन शर्माले उच्चस्तरीय छलफल गरेका छन् । अर्थतन्त्रमा गम्भीर समस्या देखिएपछि मंगलबार अर्थ मन्त्रालयमा उनले प्रधानमन्त्री कार्यालयका राज्यमन्त्री उमेश श्रेष्ठ तथा योजना आयोगका उपाध्यक्ष डा. विश्व पौडेल र राष्ट्र बैंकका गभर्नर महाप्रसाद अधिकारीसँग छलफल गरेका हुन् ।
सो छलफलमा अर्थ मन्त्रालयका सचिवहरु मधु मरासिनी तथा राजस्व सचिव कृष्णहरि पुस्करको पनि सहभागिता रहेको थियो । यस्तै वाणिज्य मन्त्रालयका सचिव गणेश पाण्डे थिए । राष्ट्र बैंकका डेपुटी गभर्नर बमबहादुर मिश्र तथा आन्तरिक राजस्व विभागका महानिर्देशक रितेश शाक्य र भन्सार विभाग कमल भट्टराई सहभागी थिए ।
राष्ट्र बैंकले सोमबार वाणिज्य बैंकका प्रमुख कार्यकारी अधिकृतलाई बोलाएर प्रतितपत्र (एलसी) खोल्न कडाइ गर्न निर्देशन दिएको थियो । मंगलबार अर्थमन्त्रीसँगको उच्च स्तरिय छलफलमा अर्थतन्त्रमा अहिले समस्या देखिएपनि खराब नभएको निष्कर्ष निकालेका थिए ।
