काठमाडौं । लगानी बोर्डमा १० खर्बका ३१ आयोजना पाइपलाइनमा रहेको छ। जसमा सबैभन्दा धेरै जलविद्युत् परियोजनाहरु रहेका छन् । ऊर्जाका १७ परियोजनाहरूमध्ये ३ खर्बका परियोजना निर्माण चरणमा रहेको लगानी बोर्ड, नेपालका प्रमुख कार्यकारी अधिकृत सुशिल भट्टले बताए । साथै आगामी ३ वर्षमा थप ३ खर्बको लगानी आउन सक्ने पनि उनले बताए ।
यस्तै उनले अहिले पनि अरुण ३ लगायतका केही परियोजना विदेशी लगानीबाट बनिरहेको बताए । सिमेन्ट र खानीमा पनि विदेशी लगानीका परियोजना अगाडि बढेको छ । हाल राम्रो मोडालिटीमा हाइड्रो पावरका प्रोजेक्टमात्र अगाडि बढेका तर अन्य क्षेत्रका परियोजना अगाडि बढ्न नसकेको सीईओ भट्टको भनाई छ । क्लिन ट्रान्सपोर्ट, औद्योगिक पूर्वाधार, आधारभूत पूर्वाधार, प्रशारण लाइन पनि पीपीपी मोडलमा बनाउन आफुहरुसंग प्रयाप्त नीति नभएको भट्टले बताए ।
लगानी बोर्ड र उद्योग विभागबीचको समन्वय राम्रो हुनुपर्ने भट्टले बताए । नेपालमा यी दुई निकायले विदेशी लगानी स्वीकृत गर्ने गर्दछ । लगानी बोर्डले ६ अर्बभन्दा माथिका परियोजना र २ सय मेगावाट क्षमताभन्दा माथिको जलविद्युत परियोजनाको विदेशी लगानी स्वीकृति गर्छ । यस्तै उद्योग विभागले ६ अर्बभन्दा तलका परियोजना स्वीकृति गर्छ ।
