काठमाडौं । देशभर विभिन्न घटना घट्छन् । केहि सामान्य समाचारका विषय हुन्छन्, केहि समाचारले असामान्य कम्पन पैदा गरिदिन्छन् । केहि तस्विर फगत तस्विरमात्र हुन्छन् भने केहि तस्विरले देश बोल्दछन् । हामी हरेक दिन सातै प्रदेशका त्यस्ता तस्विरहरुलाई प्रकाशन गर्छौँ, जसले देश र जनताको आर्थिक स्थिति प्रतिनिधित्व गर्छ । समसामयिक विषयमा राज्यलाई खबरदारी गर्छ र जनताको जीवन बोल्छ ।
आज कुन-कुन ठाउँमा के-के भयो ? यी दृश्यहरु आफैं बोलिरहेछन् । आजको अंकमा हामीले काठमाडौँ महानगरपालिका वडा नं २३ स्थित चिकमुङ्गलमा टेकोका भरमा अडिएका घरमुनिको सडकबाट यात्रा गर्दै सवारी र यात्रुका तस्विरदेखि घोराही–१७, कर्जाहीका शालिकराम घर्तीमगरले व्यावसायिक रूपमा पालिएका बङ्गुरसम्मका तस्विरलाई फोटोमा समेटेका छौं ।
हेरौं फोटो समाचार
काठमाडौँ महानगरपालिका वडा नं २३ स्थित चिकमुङ्गलमा टेकोका भरमा अडिएका घरमुनिको सडकबाट यात्रा गर्दै सवारी र यात्रु । विसं २०७२ वैशाख १२ को भूकम्पले भत्किएका मुख्य शहर भित्रका संरचना अझै पुनःनिर्माण सम्पन्न भएको छैन ।
घोराही–१७, कर्जाहीका शालिकराम घर्तीमगरले व्यावसायिक रूपमा पालिएका बङ्गुर । पाल्न थालेको एक वर्षमै आम्दानी लिन थालेको उहाँ बताउनुहुन्छ ।
कैलालीकोे प्रेस सेन्टरद्वारा यहाँ आयोजित पत्रकार सम्मेलनमा बोल्दै नेपाल कम्युनिष्ट पार्टी (माओवादी केन्द्र) का अध्यक्ष पुष्पकमल दाहाल ‘प्रचण्ड’ ।
भोलिदेखि हुन लागेको एसईइ परीक्षाको तयारीका विषयमा पत्रकार सम्मेलनमार्फत जानकारी दिँदै शिक्षा विकास तथा समन्वय एकाई बागलुङका प्रमुख कुशमराज उपाध्याय । बागलुङमा चार हजार ८९६ जनाले यस वर्ष एसईइ परीक्षामा सहभागी हुँदैछन् ।
समुद्री तहदेखि पाँच हजार २०० मिटर उचाइमा अवस्थित ताप्लेजुङको फक्ताङ्लुङ गाउँपालिका—७, टिप्ताला नाकामा चीनले निर्माण गरेको संरचना ।
यही बैशाख ३० गते हुने स्थानीय तहको निर्वाचनका लागि निर्वाचन आयोगको कान्तिपथस्थित कार्यालयमा बिहीबार मतपेटीका ओसारपसार गर्दै कामदारहरु।
