काठमाडौं । सार्वजनिक सवारी साधनको भाडा बढेको छ । यातायात व्यवस्था विभागले ५.१ प्रतिशतसम्म भाडा वृद्धि गरेको हो । नयाँ भाडादर जेठ ४ गते बुधबारदेखि लागू हुने भएको छ । विभागका अनुसार यात्रुवाहक सवारी साधनको भाडा ३.५ प्रतिशत बढाइएको छ भने पहाडी बाटोमा सञ्चालन हुने मालबाहक सवारी साधनको भाडा ४.६ प्रतिशतले बढाइएको छ ।
यस्तै तराईमा सञ्चालन हुने मालबाहक सवारी साधनको भाडा ५.१ प्रतिशतले बढाइएको छ । सार्वजनिक यातायातको भाडा समायोजन गर्दा इन्धनको बजार मूल्य ५ प्रतिशत वा सोभन्दा बढीले बढेको खण्डमा वा घटेको खण्डमा विभागले वैज्ञानिक भाडा समायोजन प्रणाली अनुसार स्वचालित रुपमा भाडा बढाउने/घटाउने व्यवस्था छ ।
