काठमाडौं । विन नेपाल लघुवित्तको वार्षिक साधारणसभा हुने भएको छ । कम्पनीको वार्षिक साधारणसभा मंगलबार जेठ ३१ गते हुने भएको हो । सभा इन्द्रावती सामुदायिक सेवा केन्द्र, फटकशीला सिन्धुपाल्चोकमा विहान ११ बजे हुने भएको छ ।
सभामा गत वर्षको नाफाबाट सेयरधनीलाई ९.३३ प्रतिशत बोनस सेयर वितरण गर्नेछ । यस्तै बोनसमा लाग्ने कर प्रयोजनका लागि ०.५ प्रतिशत नगद लाभांश वितरण गर्ने एजेण्डा पनि रहेको छ । बोनस वितरण पश्चात कायम हुने चुक्ता पुँजीबाट एफपीओ निष्कासन गर्ने विशेष प्रताप पनि पारित हुनेछ ।
संस्थापक समूहबाट ४ जना र सभामार्फत सर्वसाधारण समूहबाट २ जना सञ्चालकहरुको निर्वाचन हुने भएको छ । गत आर्थिक वर्षको वार्षिक प्रतिवेदन, नाफा–नोक्सान हिसाब तथा नगद प्रवाह विवरणमा पनि छलफल हुनेछ । बोनस वितरणपछि चुक्ता पुँजी बढ्ने भएकाले सोही बमोजिम प्रबन्धपत्र तथा नियमावली संशोधन गर्ने एजेण्डा रहेको छ ।
अन्य लघुवित्तसँग मर्जर वा एक्विजिसनमा जानु परेमा सम्पूर्ण कामको अख्तियारी सञ्चालक समितिलाई दिइनेछ । सभा प्रयोजनका लागि कम्पनीले जेठ १८ गतेदेखि ३१ गतेसम्म बुक क्लोज गरेको छ । तर्सथ जेठ १७ गतेसम्म कायम रहेका सेयरधनीले सभामा भाग लिन र प्रस्तावित लाभांश पाउन सक्ने भएका छन् ।
