काठमाडौँ । आन्दोलनरत लगानीकर्ता र सुरक्षाका लागि नेपाल धितोपत्र बोर्ड अगाडी बसेका प्रहरीबीच झडप भएको छ । आन्दोलनरत लगानीकर्ताले धितोपत्र बोर्डका अध्यक्षसहित अन्य कर्मचारीहरुलाई बोर्डभित्रै थुनेपछि झडप भएको हो । बोर्डका अध्यक्ष हमालको सम्बोधनपछि झन् रुष्ट बनेका लगानीकर्ताहरुले ‘आजै छिनोफानो गरौँ’ भन्दै लगानीकर्ताहरुलाई बोर्ड आउन आह्वान गरेपछि त्यहाँ लगानीकर्ताहरुको उपस्थिति पनि थप बाक्लो बनेको थियो ।
बोर्डका अध्यक्षको सम्बोधन सकिएपछि घर जान कुरिरहेका कर्मचारीहरु पनि घर जान नपाएपछी अन्तत: बोर्डका उच्च अधिकारीहरुको डिजाइनमा प्रहरीलाई बल प्रयोग गर्न लगाइएको थियो । आक्रोशित लगानीकर्ताहरुले जे पनि गर्न सक्छन् भन्दै बोर्डका कर्मचारीले सुरक्षा मागेपछि उनीहरुलाई प्रहरीले स्कर्टिङ गरेर घर पठाएको छ ।
यो समाचार तयार गर्दासम्म धितोपत्र बोर्ड अगाडी लगानीकर्ताहरुको आन्दोलन जारी छ भने, बोर्ड अध्यक्ष हमाल अर्थ मन्त्रालय निस्किएका छन् । उनी अर्थ मन्त्रालयमा बैठकका लागि गएका हुन् । बोर्डको पत्रकार सम्मेलन सकिएलगत्तै आन्दोलनरत सेयर लगानीकर्ताहरुले चर्का नाराबाजी गरेका थिए । अध्यक्षको सम्बोधनले आफ्नो आन्दोलन कमजोर बनाउन खोजेको भन्दै उनीहरुले माग पूरा नभएसम्म आफ्नो आन्दोलन जारी रहनेसमेत बताईरहेका छन् ।
पत्रकार सम्मेलनका क्रममा बोर्ड अध्यक्ष हमालले आफुले सक्ने माग ३ महिनाभित्र पूरा गर्ने र आफुले आन्दोलनरत लगानीकर्ताका सबै माग पूरा गर्न नसक्ने बताएपछि स्थिति असामान्य बनेको हो ।
बिगत ७ दिनदेखि विभिन्न माग राख्दै लगानीकर्ता तिलक कोइराला अनशनमा बसेका छन् ।
