काठमाडौँ । नेपाल धितोपत्र बोर्डका अध्यक्ष रमेश कुमार हमालको सम्बोधनपछि आन्दोलनरत सेयर लगानीकर्ता ‘फायर’ भएका छन् । सम्बोधनका क्रममा हमालले लगानीकर्ताका सबै माग सम्बोधन गर्न नसकिने र पूरा गर्न सकिने मागहरु ३ महिनाभित्र पूरा गर्ने बताएपछि लगानीकर्ताहरु फायर भएका हुन् । धितोपत्र बोर्ड अगाडी आन्दोलनरत लगानीकर्ताले बोर्ड अध्यक्षको सम्बोधन झारा टार्ने खालको मात्र भएको र त्यसले आफ्नो आन्दोलनका कुनै पनि माग सम्बोधन गर्न नसक्ने बताउंदै लगानीकर्ताहरुले बोर्ड अगाडी चर्को नाराबाजीसमेत गरिरहेका छन् ।
लगानीकर्ता ७ दिनसम्म अनशनमा बस्दा पनि धितोपत्र बोर्ड लगायत सम्बन्धित निकायले कुनै पनि वास्ता नगरेको बताउंदै उनीहरुले अराजकताको पराकाष्टा नाघ्नुपर्ने अवस्था आएकोसमेत बताएका छन् । उनीहरुले ‘आजै छिनोफानो गरौँ’ भन्दै लगानीकर्ताहरुलाई बोर्डको कार्यालय अगाडी जम्मा हुन आह्वान गरिरहेका छन्। यो समाचार तयार गर्दासम्म पनि बोर्ड अगाडी लगानीकर्ताहरुको आन्दोलन जारी छ भने धितोपत्र बोर्डका कर्मचारीहरु कार्यालयभित्रै थुनिएका छन् ।
आन्दोलनरत लगानीकर्ताहरुले आफ्ना मागहरू सम्बोधन नभएसम्म पछि नहट्ने बताईरहेका छन् । यता ७ दिनसम्म अनशन बसिरहेका तिलक कोइरालाको स्वास्थ्य अवस्था भने निकै कमजोर बनिरहेको छ ।
