काठमाडौँ । धेरैको अनुमान थियो आज तिलक कोइरालाले अनशन तोड्छन् । कतिपय संचारमाध्यमले त उनले अनशन तोडिसके वा आज कन्फर्म तोड्छन् भनेर नै लेखे । अर्कोतर्फ प्रधानमन्त्रीले नै सचिवालयमार्फत अनशन तोडाउनेगरी सहमति गर्न धितोपत्र बोर्डलाई निर्देशनसमेत दिएका थिए । धितोपत्र बोर्ड सोहि अनुसार तातेको पनि थियो । तर तिलक कोइरालाले उधारो सहमति नमान्ने भनेपछि अन्तत: अनशन तोडिएन । कोइराला भन्छन्- ‘काइते पत्र लिएर आए । मैले अस्वीकार गरें । माग पूरा नहुन्जेल अनशन बस्छु । तर उधारो सहमति मान्दिन ।

नेपाल धितोपत्र बोर्डका अध्यक्षले कोइरालाको अनशन टुंग्याउन र उनका मागहरुलाई सम्बोधन गर्न कार्यान्वयन समिति बनाउन आफु तयार भएको बताए । तर तिलक कोइरालाले समिति बनाएर होइन, कार्यान्वयनको निर्णय गरेर मात्र आफुले अनशन तोड्ने बताएपछि आज अनशन तोडिएन । उनले धितोपत्र बोर्डले ल्याएको पत्रलाई अस्वीकार गरी फिर्ता गरिदिएपछि नेपाल धितोपत्र बोर्डका अध्यक्ष अर्थ मन्त्रालयतर्फ लागे भने कर्मचारी घरतिर हिंडे । अगुवा भनिएका लगानीकर्ताका नेता पनि कता हिंडे, हिँडे । त्यसपछि अनशन तोड्ने कुनै सम्भावना नै रहेन ।

यसो त कोइरालाको अनशन तोडिने सम्भावना भोलि पनि कम छ । किनकि बोर्ड र कोइरालाको अडानबीच ठुलो ग्याप छ । बोर्ड अनशन तोडेर मात्र समिति बनाउने भनिरहेको छ भने कोइराला, आफ्ना मागको कार्यान्वयन गरेर मात्र अनशन तोड्ने अडानमा छन् । र त उनले अनशन तोड्ने सम्भावना भोलि पनि निकै कम छ ।