काठमाडौं । विकास बैंकहरुले आफुहरुलाई पनि सरकारी कारोबार गर्न दिन माग गरेका छन् । आर्थिक वर्ष २०७९-८० को मौद्रिक नीति तर्जुमाको सिलसिलामा सरोकारवालाहरुसँग अन्तरक्रिया कार्यक्रममा बोल्दै विकास बैंकहरुको छाता संगठन डेभलपमेन्ट बैंकर्स एसोसियसन नेपाल डीबीएनका अध्यक्ष प्रद्युमन पोखरेलले विकास बैंकहरुको तर्फबाट यस्तो माग गरेका हुन् ।
विकास बैंकहरु नेपालका दुरदराजका क्षेत्र तथा ग्रामिण क्षेत्रमा काम गरिरहेको र त्यो क्षेत्रमा काम गरेको राम्रो अनुभव भएको पोखरेलले बताएका छन् । यस्तो सहयोगको काम गरिरहेको आफुहरुलाई पनि सरकारी कारोबार गर्न अनुमति दिनलाई नेपाल राष्ट्र बैंक समक्ष माग राखेका हुन् । विकास बैंकहरुलाई सरकारी कारोबार गर्न दिँदा स्रोत पनि हुने र बैंकिङ पहुँच पनि बढ्ने भन्दै उनले सरकारी कारोबार गर्न माग अगाडी सारेका छन् ।
विदेशी मुद्रा संचितिमा दबाब परिरहेको अहिलेको अवस्थामा आत्मनिर्भर हुन सकिने क्षेत्रका उद्योग व्यवसायमा हुने लगानीको जोखिम भार पनि घटाउनु पर्ने उनले सुझाव दिएका छन् । त्यस्तै अहिले समग्र विश्वअर्थतन्त्र नै दबाबमा परेका बेला सबै क्षेत्रले सन्तुलित र धैर्यता कायम गरेर काम गर्नुपर्ने बताउदै यसरी काम गर्ने संस्थाहरुलाई राष्ट्र बैंकले प्रोत्साहन गर्नुपर्ने उनको सुझाव थियो ।
