काठमाडौँ । रातको झन्डै साढे २ बजेको हुँदो हो, मोरङको जहदास्थित माछापुच्छ्रे बैंकको शाखाका सुरक्षा गार्ड श्रवणकुमार सिंहले कतै,केहि आवाज आईरहेकोजस्तो सुने । कसैले केहि फोडेजस्तो, कोहि आफ्नो बैंकभित्र पस्न खोजेजस्तो । स्थिति सामान्य पक्कै छैन भन्ने लागेपछि उनले आवाज आइरहेको ठाउँतिर हेरे । नभन्दै स्थिति सामान्य थिएन । एउटा अपरिचित समूह बैंकको पछाडीपट्टीको ढोका फुटाएर भित्र पस्दै थियो । उनी आत्तिए । स्थिति आत्तिने खालको थियो पनि । उनले देख्दासम्म बैंकको चेनगेट र अर्काे गेट लुटेराहरुले भत्काईसकेका थिए ।
‘बैंकभित्र मान्छेहरु प्रवेश गरेको देखेपछि मैले खुकुरी देखाएर तर्साउन खोजेँ । को हो त्यहाँ ? भनेर कराएँ । तर उनीहरु एक सुरले भित्र पस्दै थिए ।’ सिहंले भने- ‘त्यसपछि मैले घर, छिमेकमा फोन गरेर बैंकमा लुटेरा छिरेको खबर गरेँ । यतिन्जेलसम्म पनि ती मान्छेहरु त्यहाँबाट भागेनन् । त्यसपछि मैले उनीहरुलाई लक्षित गर्दै ‘मान्छे आउँदैछन्, पुलिस पनि आइपुग्यो’ भनेर कराएँ । नभन्दै केहि मानिसहरु कराउँदै बैंकतर्फ आइपुगे पनि । त्यसपछि सो समूह त्यहाँबाट भाग्यो । भित्र २ जनामात्र प्रवेश गरेका थिए । तर बाहिरचाहिँ ७-८ जना जति मान्छे थिए ।’
लुटेरा समूह भागेपछि पनि सिहं कराईरहे । केहि क्षणपछि मानिसहरु त्यहाँ जम्मा भए । उनलेसमेत प्रहरीलाई खबर गरिसकेका थिए । त्यहाँ आएका मान्छेहरुले पनि प्रहरीलाई फलोअप गरेपछि प्रहरी घटनास्थल पुग्यो । सिंहको बयानपछि प्रहरीले यस विषयमा थप अनुसन्धान सुरु गरेको छ । प्रहरीका अनुसार बैंकको सीसी क्यामेरामा दुई जना बैंकभित्र प्रवेश गरेको देखिएको छ । सीसी क्यामरामा देखिएकाहरुले मुख छोपेको देखिएको छ । जिल्ला प्रहरी कार्यालय मोरङका प्रवक्ता प्रहरी नायव उपरीक्षक दीपक श्रेष्ठका अनुसार जहदा गाउँपालिका–५ मा बैंक रहेको भवनको पछाडिपट्टीको ढोका फोडिएको पाइएको छ भने बैंक लुट्ने मनसायका साथ ती लुटेरा आएका थिए वा घरमा चोरी गर्ने बदनियतका साथ आएका थिए भन्ने तथ्यबारे थप अनुसन्धान भईरहेको छ । बैंक रहेको सो घरको पहिलो तल्लामा माछापुच्छ्रे बैंकको साखा छ भने दोश्रो तल्लामा सो घरका घरभेटी बस्छन् । सो भवनको पछाडीपट्टीको गेट फुटाईएको छ । प्रहरीले अहिले सीसीटिभि फुटेज हेरेर घटनाबारे थप अनुसन्धान गरिरहेको छ । यता माछापुच्छ्रे बैंकका सूचना अधिकारी सुनिल खतिवडाले पनि आफुले पनि बैंकमा भएको लुटको प्रयासबारे सुनेको र प्रहरीले यस विषयमा अनुसन्धान गरिरहेको जानकारी दिएका छन् ।
