काठमाण्डौ । नेपाल राष्ट्र बैंकले आर्थिक वर्ष २०७९/८० को मौद्रिक नीति शुक्रबार सार्वजनिक गर्ने भएको छ । राष्ट्र बैंकका एक उच्च अधिकारीले मौद्रिक नीति शुक्रबार ल्याउने तयारी गरेको पुष्टी गरेका छन् ।

बिहीबार प्रधानमन्त्री शेरबहादुर देउवासमक्ष मौद्रिक नीतिको ब्रिफिङ गरेपछि अन्तत: शुक्रबार मौद्रिक नीति ल्याउने तयारी भएको हो । राष्ट्र बैंकका एक उच्च अधिकारीका अनुसार शुक्रबार राष्ट्र बैंकको संचालक समिति बस्ने र त्यसपछि मौद्रिक नीति सार्वजनिक हुने भएको हो ।

राष्ट्र बैंकको संचालक समितिले मौद्रिक नीति पास गर्नुपर्छ । सो नीति संचालक समितिले पास गरेपछि अन्तत: मौद्रिक नीति सार्वजनिक हुन्छ ।

‘ड्राफ्ट तयार भयो । अव संचालक समितिले नीति पास गर्छ ।’ अर्थ सरोकारसँग कुराकानी गर्दै राष्ट्र बैंक स्रोतले भन्यो, ‘संचालक समितिले पास गर्नेबित्तिकै मौद्रिक नीति आउँछ । शुक्रबार बेलुकी नीति सार्वजनिक हुने पक्कापक्की जस्तै छ।’