काठमाडौँ । नेपाल राष्ट्र बैंकले मौद्रिक नीति सार्बजनिक गरेसंगै सेयर बजारमा सकारात्मक प्रभाव परेको देखिएको छ । मौद्रिक नीति सार्वजनिक भए पछिको कारोबारको पहिलो दिन आइतबार सेयर बजारमा ६१.०५ अंकको बढोत्तरी भएको छ । मौद्रिक नीतिले सेयर धितो कर्जा गत वर्षको तुलनामा चालु आर्थिक वर्ष २०७९/८० को लागि केही खुकुलो गर्दा यसको प्रभाव बजारमा सकारात्मक देखिएको हो । कारोबारको पहिलो दिन बजार ३.०३ प्रतिशतले बढेर २०७८.५१ विन्दुमा पुगेको हो।

आइतबार तीन वटा कम्पनीको सेयर मूल्यमा पोजेटिभ सर्किट लागेको छ । सेन्ट्रल फाइनान्स कम्पनी, समृद्धि फाइनान्स कम्पनी र मल्टिपर्पोज फाइनान्स कम्पनीको सेयर मूल्यमा पोजेटिभ सर्किट लागेको हो । बजार बढेका दिन अधिकांश ऋणपत्रसहित १२ वटा कम्पनीको सेयर मूल्य भने घटेको छ । आज गुमाउने कम्पनीको सेयर मूल्य १.५२ प्रतिशतले मात्रै घटेको छ ।

आज सबैभन्दा बढी कारोवार शिवम् सिमेन्टको भएको छ । यस कम्पनीको ३९ करोड ७१ लाख ३१ हजार ५७ रुपैयाँ बराबरको सेयर कारोबार भएको छ । नेप्सेमा सूचीकृत कम्पनीमध्ये आज २१९ कम्पनीको ६४ लाख २३ हजार कित्ता सेयरको ४२ हजार पटक कारोवार भएको छ । आज २ अर्ब ७३ करोडमाथिको  सेयर कारोवार भएको पनि नेप्सेले जानकारी दिएको छ ।