काठमाडौँ । मर्जरको तयारीमा रहेका प्रभु बैंक र सेञ्चुरी कमर्सियल बैंकबीच मर्जर हुन्छ वा हुँदैन भन्ने छिनोफानो आज (बुधबार) हुने भएको छ । बुधबार सेञ्चुरीले बोर्ड बैठक डाकेको छ । सो बोर्ड बैठकमा सेञ्चुरीले प्रभुसँग जाने निर्णय गर्यो भने सम्भवत: यहि शुक्रबार सम्झौतापत्रमा हस्ताक्षर हुनेछ । यो मर्जरमा प्रभु सबै कुराले तयार देखिएको छ भने सेञ्चुरीमा बोर्डभित्रको मनमुटावका कारण मर्जरसम्बन्धि निर्णय हुन सकेको छैन ।
बोर्डका अध्यक्ष, अर्का एक संचालक र सीइओ प्रभुसँगको मर्जरको पक्षमा छन् भने बोर्डभित्रकै एउटा समूह प्रभुसँग मर्जरमा नजाने अडानमा छन् । अर्थ सरोकारलाई प्रभुका एक संचालकले दिएको जानकारी अनुसार आज नै सेञ्चुरीको बोर्ड बैठकले प्रभुसँग मर्जरमा जाने निर्णय गर्नेछ भने यहि अनुसार शुक्रबार एमओयु हुनेछ ।
‘आज बोर्ड बैठक छ । पेलेरै भएपनि बहुमतले निर्णय हुन्छ । प्रभुसँग मर्जरमा जानुको विकल्प छैन।’ ती संचालकले भने- ‘हामीले नाम छोडिदिने भएका छौं । प्रभुले राम्रो स्वाप दिएको छ । हाम्रो सीइओलाई प्रभुमा सिनियर डेपुटी सीइओ दिने भनिएको छ । अरु केहि कुरामा समस्या छैन ।’
यता प्रभुले सेञ्चुरी नमिले अर्को एक बैंक प्राप्तिका लागि छलफल बढाएको छ । तर सेञ्चुरीसँगको तयारी सफल भएन भने यो असार मसान्तभित्र सो मर्जर हुने देखिएको छैन । यद्यपी सेञ्चुरीसँग सबै कुरा मिलिसकेको र सेञ्चुरीको बोर्डले अप्रुभल दिनेबित्तिकै प्रभु र सेञ्चुरीबीच एमओयु हुने प्रभु बैंक स्रोतको दाबी छ।
