काठमाडौँ । संस्कृति, पर्यटन तथा नागरिक उड्डयन मन्त्रालयका उपसचिव प्रमोद नेपाल साढे २२ लाख घुससहित पक्राउ परेका छन् । मंगलबार उपसचिव नेपाललाई अख्तियार दुरुपयोग अनुसन्धान आयोगको गुप्तचरी टोलीले घुस रकमसहित पक्राउ गरेको हो ।
‘प्याराग्लाइडिङ्गको उडान अनुमतिका लागि उपसचिव नेपालले घुस मागेको र त्यो रकम लिएको भन्ने सूचनाका आधारमा खानतलासी गर्दा उनको साथबाट घुसको ६ लाख रकम भेटिएको अख्तियार दुरुपयोग अनुसन्धान आयोगले जनाएको छ । आयोगका अनुसार वाई उद्योग तथा अन्तर्राष्ट्रिय सम्बन्ध शाखाका प्रमुख समेत रहेका उपसचिव नेपालले चडेको गाडीमा थप १६ लाख रकम पनि भेटिएको थियो । सो रकमको स्रोत भने खुलेको छैन । नागपोखरीस्थित होटल अरण्यमा घुस लिएको पुष्ठी भएपछि उनलाई पक्राउ गरिएको हो ।
पछिल्लो समय पर्यटकहरुको केन्द्रबिन्दुमा ‘प्याराग्लाईडिङ्ग’ छ । सो सेवा संचालनका लागि संस्कृति, पर्यटन तथा नागरिक उड्डयन मन्त्रालयबाट अनुमति लिनुपर्छ । सोही अनुमति पत्रका लागि व्यवसायीसँग सो घुस रकम उपसचिव नेपालले लिएको आयोगले बताएको छ । उनको साथबाट बरामद गरिएको साढे २२ लाखमध्ये ६ लाख घुस लिएको स्पष्ट भएपनि १६ लाखको स्रोत भने खुलेको छैन ।
पक्राउ परेका नेपाल ‘गोल्ड मेडलिस्ट’ पनि हुन् । त्रिभुवन विश्वविद्यालयबाट अर्थशास्त्रमा स्नातकोत्तर गर्ने क्रममा उनले स्वर्णपदक पाएका थिए । सरकारी सेवामा प्रवेश गरेपछि उनले नागरिक उड्ययन प्राधिकरणमा काम गरेका थिए । एयर ट्राफिक कन्ट्रोलर–एटीसी) पनि भएका थिए ।
