काठमाडौं । यतिबेला ‘झाडीवाली’ दिक्षाको खुब चर्चा छ बजारमा । पैसा नै नभएको चेक दिएर निघालोघारीमा लुकेर बसेकी उनलाई प्रहरीले झाडीबाटै पक्राउ गरेको थियो । प्रहरीले नै झाडीमा लुकेर बसेको फोटो सार्वजनिक गरिदिएपछि अहिले यो प्रकरण ‘झाडीवाली दीक्षा’को प्रकरणका रुपमा चर्चित छ । चेक बाउन्स मुद्धामा पक्राउ परेकी दिक्षाका अनेक हर्कतहरु पनि एक-एक गरी बाहिर आउन थालेका छन् । यतिसम्मकि उनले आफ्नै सासुसुराबाटसमेत १ करोड बढी रकम ठगी गरेको तथ्यसमेत बाहिर आएको हो । उनी पक्राउ परेपछि उनको ठगीको अनेक जालो देखिएको छ । यतिसम्मकि प्रहरीले सुरुमा पक्राउ गर्दा उनलाई उनी यहाँसम्म ठगीकि ‘मास्टर माइन्ड’ हुन सक्छिन् भन्ने कल्पनासमेत गरेको थिएन ।
‘चेक बाउन्स’मा दर्जनौं ठगी !
दिक्षाले बैशाख २६ गते कुल बहादुर विकलाई ३ लाखको चेक दिएकी थिईन् । तर उनले दिएको खातामा रमक मौज्दात नै थिएन । रकम नै नभएको खाताको चेक दिएको भन्दै विकले उनी विरुद्ध ‘चेक बाउन्स’को अभियोगमा प्रहरीमा उजुरी दिएका थिए । सोही उजुरीका आधारमा खोजी गर्दैैजाँदा प्रहरीेले दिक्षालाई बिरेठाँटीको निगालो घारीबाट पक्राउ गरेको थियो ।
‘चेक बाउन्स’को मुद्धामा पक्राउ परेकी दिक्षाको यो पहिलो ठगी भने थिएन । यसभन्दा अघि पनि उनले दर्जनौँलाई यसैगरी ठगी गरेकी थिईन् । पोखराका अधिकांश बैंक तथा फाइनान्सहरुमा उनको नाममा खाता छ । उनले धेरैलाई सोही बैंक तथा फाइनान्सको चेक दिने गर्थिन् । तर चेक दिएको दोस्रो दिन नै उनले खाता बन्द गर्थिन् । यसरी उनले पोखराका दर्जनौं बढीलाई ठगी गरेको तथ्य प्रहरीले खुलाएको छ । उनी पक्राउ परेसँगै अहिले उनीबाट ठगिएकाहरु प्रहरीको सम्पर्कमा आउन थालेका छन् ।
आफ्नै श्रीमान र ससुराबाट करोडौँ ठगी !
बैंकिङ कसुर मुद्धामा पक्राउ परेकी दिक्षा पुनले आफ्नै सासुससुरा र श्रीमानबाट करोडौँ रकम ठगी गरेको तथ्य खुलेको छ । भारतीय सेनामा कार्यरत २८ वर्षीया बलबहादुर पुनसँग ३ वर्षअघि (२०७६ फागुनमा) बिवाह गरेकी दिक्षाले उनैलाई ठगी गरेको प्रहरीको अनुसन्धानले खुलाएको छ । फेसबुकबाट भेट भएकी दिक्षाले बल बहादुरलाई बेलायतको नागरिक समेत रहेको भन्दै मायाजालमा फसाएकी थिईन् । लकडाउनका समयमा हतार–हतार उनै बलबहादुरसँग बिहे गरेकी दिक्षाले १ हप्तामै बिहेदर्ता र नागरिकताको सिफारिस समेत लिएकी थिईन् ।
पटक-पटक गरी दिक्षाले श्रीमान र सासूससुराबाट करोडौँ रकम ठगी गरेकी हुन् । दिक्षाले नक्कली पेट बनाएर पेटमा ४ वटा बच्चा भएको भन्दै सासूससुरालाई झुट समेत बोलेकी थिईन् । कहिलेकाहीँ गाउँ जाँदा ठुलो पेट बनाएर जाने दिक्षाले बच्चा जन्माउनका लागि ४० लाख लाग्ने भन्दै सासु-ससुरालाई ठगेकी थिईन् । यतिसम्म कि उनले पेटमा ४ वटा बच्चा भएकोले जन्मिन समय लागने समेत बताएकी थिईन् । तर १५ महिनासम्म पनि बच्चा नजन्मिएपछि उनका सासुसुराले ठगिएको थाहा पाएका थिए । गाउँमा बसेर बच्चा जन्माउन नसकिने भन्दै पोखरामै बस्न थालेकी दिक्षाले घरजग्गा किन्ने भन्दै श्रीमानबाट ६० लाख रूपैयाँ मागेकी थिईन् ।
नक्कली डाक्टरको रुपमा ठगी, बैंक र कागज दुवै नक्कली !
सासुआमा गौमाया पुनको नममा जग्गा पास गरेकी उनले बैंकमा लालपुर्जा राखेर ऋण लिएको समेत बताएकी थिईन् । बैंकबाट हरेक महीना सावा ब्याजको किस्ता तिर्न भनेर गौमायालाई फोन आउँथ्यो । तर गौमायाले करीब ३० लाख रूपैयाँ किस्ता तिरिसकेको बताएकी छिन् ।
यसो त बैंकिङ्ग कसूरमा प्रहरीको हिरासतमा रहेकी दिक्षाले आफु डाक्टर भएर समेत धेरैलाई ठगेको रहस्य पनि खुलेको छ । उनले आफू सर्जन डाक्टर भएको भन्दै गाउँभरी भ्रम सृजना गरेकी थिईन् । यतिसम्म कि दिक्षाले डाक्टरको नक्कली परिचयपत्र पनि बनाएकी थिइन् । फिस्टेल र गण्डकी अस्पतालमा काम गर्छु भन्दै उनले गाउँलेहरुलाई झुट बोल्ने गरेकी थिईन् ।
आफैँ डाक्टर भएपछि उनका सासूससुराले पनि उनलाई विश्वास गरेर उनले भनेजस्तै गरेका थिए । तर, गाउँबाट बिरामीहरू जाँदा उनी हरेक पटक सम्पर्कबिहिन हुने गर्थिन् । पक्राउ परेपछि उनीबाट ठगिएकाहरु अहिले प्रहरीको सम्पर्कमा आउन थालेका छन् ।
के भन्छ प्रहरी ?
यता प्रहरीले पनि दिक्षाको ठगिको जालो निकै ठुलो भएको निश्कर्ष निकालेको छ । ‘चेक बाउन्सको मुद्धामा पक्राउ परेकी उनी विरुद्ध बैंकिङ्ग कसूरको अनुसन्धान गर्दै जाँदा ठगीका थप नयाँ रहस्य खुलेको जिल्ला प्रहरी कार्यालय कास्कीका प्रवक्ता तथा प्रहरी नायब उपरिक्षक सुन्दर तिवारीले बताएका छन् । ‘दिक्षाको ठगीको जालो निकै ठुलो छ । उनले विभिन्न बाहाना र जालसाझी गरी धेरैको लाखौँ रकम ठगी गरेकी रहिछन् । यतिसम्मकी उनले आफ्नो श्रीमान र सासूससुरलाई समेत ठग्न बाँकी राखेको देखिएन ।’ अर्थ सरोकारसँग कुराकानी गर्दै उनले भने,– ‘उनी ठगीमा मास्टर माईन्ड रहिछन् । अहिले उनीबाट ठगीएका थुप्रै पीडितहरु हाम्रो सम्पर्कमा आउन थालेका छन् । अनुसन्धान जारी छ, अझै कति रहस्य खुल्ने हुन् त्यो पछि नै थाहा हुन्छ ।’
