काठमाडौँ। अघिल्लो साता नेपाल राष्ट्र बैंकले जारी गरेको ९१ दिने ट्रेजरी बिलको ब्याज १३.९९ प्रतिशत पुगेपछि यसले नेपाली बजारमा ठुलै हलचल मच्चाएको थियो । कतिपयले यसरी ट्रेजरी बिलको ब्याज १३.९९ प्रतिशतसम्म पुगेपछि आम जनतालाई रिस्क लिएर अव बैंकले किन ब्याज दिने भन्ने प्रश्न उठेको चर्चासमेत गरेका थिए । ट्रेजरी बिलको सो ब्याजले नेपाली अर्थतन्त्र गलत दिशामा त छैन ? भन्ने प्रश्नसमेत उब्जाएको थियो । तर पछिल्लो समय नेपाल राष्ट्र बैंकले जारी गर्ने ट्रेजरी बिलको ब्याज केही घटेको छ ।
नेपाल राष्ट्र बैंकले सोमबार जारी गरेको ९१ र १८२ दिने ट्रेजरी बिलको ब्याज दर १२ प्रतिशतभन्दा तल आएको हो । राष्ट्र बैंकले दिएको जानकारी अनुसार सोमबार जारी भएको ९१ दिनको ट्रेजरी बिलको दर ११.८० प्रतिशत कायम भएको छ भने १८२ दिनको ट्रेजरी बिलको अधिकतम दर १०.९९ प्रतिशत कायम भएको छ । अघिल्लो साता नेपाल राष्ट्र बैंकले जारी गरेको ९१ दिनको ट्रेजरी बिलको ब्याज १३.९९ कायम हुँदा एक बाणिज्य बैंकले १७ प्रतिशतसम्म बिड गरेको थियो ।
राष्ट्र बैंकले १० अर्ब १० करोड रुपैयाँको ट्रेजरी बिल नवीकरण गर्दा कायम भएको ब्याज तल झरेको हो । राष्ट्र बैंकका अनुसार बैंकहरुले कुल १६ अर्बको लागि आफ्नो दररेटसहित दाबी गरेका थिए ।
