काठमाडौं । पछिल्लो केहि समय यता विवादित छवि बनाएको एनएमबि क्यापिटलले एनएमबि सुलभ इन्भेष्टमेन्ट फण्ड–२ नामक म्युचुअल फण्डको आवेदन मिति लम्बाएको छ । साउन २६ गते निष्काशन तथा बिक्री खुला गरेको सो म्युचुअल फण्डमा साह्रै कमको आवेदन परेपछि कम्पनीले आवेदन मिति लम्बाएको हो । कम्पनीले आवदेन दिने मिति भदौ ९ गतेसम्म सारेको छ ।

क्यापिटलले प्रति इकाई १० रुपैयाँ दरको १२ करोड इकाई निष्काशन गरेको थियो । सो अनुसार सर्वसाधरणले २० करोड २० लाख इकाईका लागि आवेदन दिन सक्ने कम्पनीले व्यवस्था गरेको थियो । निष्काशन गरिएको कुल इकाईमध्ये १४ प्रतिशत अर्थात १ करोड ८६ लाख इकाई कोष प्रबद्र्धक कम्पनी एनएमबि बैंक लिमिटेड तथा १ प्रतिशत इकाई अर्थात १२ लाख योजना व्यवस्थापक एनएमबि क्यापिटलका लागि छुट्याइएको छ ।

विभिन्न विवादमा मुछिएको एनएमबि क्यापिटलले जारी गरेको सो म्युचुअल फण्डमा लगानीकर्ताको सहभागिता न्युन भएपछि अहिले कम्पनीले आवदेनको मिति सारेको हो । यस योजनाको धितोपत्र निष्काशन तथा बिक्री प्रबन्धक एनएमबि क्यापिटल लिमिटेड रहेको छ । लगानीकर्ताले नेपाल धितोपत्र बोर्डबाट स्वीकृति प्राप्त गरेका सम्पूर्ण आश्वा सदस्य बैंक तथा वित्तीय संस्थाहरु र तिनका तोकिएका शाखा कार्यालयहरुबाट आवेदन दिन सकिने व्यवस्था गरेको छ।