काठमाडौँ । नेपाल धितोपत्र बोर्डको निर्देशनविपरित आश्वा शुल्कवापत तोकिएको भन्दा दोब्बर शुल्क लिईरहेको नेपाल बैंक लिमिटेडले सि-आश्वा शुल्क खारेज गरेको छ । बैंकले एक बिज्ञप्ति जारी गर्दै अव सिआश्वा शुल्क नलिने बताएको हो ।
‘अवदेखि सम्पूर्ण ग्राहकहरुले नेपाल बैंकबाट निःशुल्क रुपमा आइपीओ भर्न सक्नेछन् ।’ नेपाल बैंकद्वारा जारी विज्ञप्तिमा भनिएको छ ।
हाल नेपाल धितोपत्र बोर्डले धितोपत्र खरिद सम्बन्धि सुबिधा उपलब्ध गराए बापत बैंक तथा वित्तीय संस्थाले बढिमा पाँच रुपैयाँ सेवा शुल्क लिन पाउने व्यवस्थाछ । तर बैंकले १० रुपैयाँ लिएर ग्राहक ठग्दै आएको थियो।
यता बैंकले अवैध रुपमा असुल गरेको रकम पनि फिर्ता गर्ने भएको छ । नेपाल बैंकले अवैध रुपमा रकम असुल गरेको खबर अर्थ सरोकारले निरन्तर प्रकाशन गरेपछि अन्तत: बैंक सीआश्वा शुल्क पनि नि:शुल्क गर्ने र अवैध रुपमा असुल गरेको रकम पनि फिर्ता गर्ने निर्णयमा पुगेको हो । बैंकले अवैध रुपमा रकम असुलेको खबर अर्थ सरोकारले सोमबार स-प्रमाण प्रकाशन गरेको थियो ।
‘अर्थ सरोकारले समाचार प्रकाशन गरेपछि बैंकले सीआश्वा शुल्क नै खारेज गर्ने निर्णय गरको छ । बैंक चौतर्फी विवादमा परिरहेका बेला सी-आश्वा शुल्क गैरकानुनी रुपमा उठाउँदा थप विवाद हुने देखिएपछि आजैबाट लागु हुनेगरी सि-आश्वा शुल्क खारेज भएको छ ।’ नेपाल बैंक स्रोतले अर्थ सरोकारसँग भन्यो ।
