उनका अनुसार नेप्सेको यहि कार्यक्रमअन्तर्गत नेप्सेले केहि समय अगाडी ‘सेयर मार्केटमा गरौँ है लगानी’ बोलको छोटो गीत नामको विज्ञापन बजारमा ल्याएको थियो । प्रस्तुती, ‘भिडियो मेकिङ’, कलाकार छनोट र निर्देशन एकदम कमजोर भएको विश्लेषण गरिए पनि नेप्सेले सुरुवात गरेको यस्तो भिडियो प्रस्तुतीलाई धेरैले ‘सकारात्मक’ भनेका थिए । सबैतिरबाट सो भिडियो सामाग्री अझ राम्रो हुन सक्थ्यो तर सुरुवात निकै राम्रो भयो भन्ने प्रतिक्रिया पाएपछि नेप्से यस्ता काममा थप हौसिएको हो ।

‘म नेप्सेमा आउने बित्तिकै मैले ख्याल गरेको कुरा थियो, सेयर सचेतनाको अभाव । यहि कुरालाई ख्याल गर्दै हामीले सेयर बजारमा बुझेर लगानी गरौँ भन्ने सन्देश दिने एउटा भिडियो सामाग्री पनि ल्याएका थियौँ । धेरैले सुरुवात राम्रो भएको प्रतिक्रिया दिनुभएको छ । भिडियो सामाग्री सोचेजस्तो राम्रो नभए पनि सुरुवात राम्रो भएको प्रतिक्रिया आएपछि हामी यस्ता भिडियो सामाग्रीहरु थप ल्याउने र तीनका गुणस्तरमा पनि विशेष ध्यान दिनेगरी कामको तयारी गरिरहेका छौँ ।’ नेपसेका सीइओ कार्कीले अर्थ सरोकारसँग भने -‘सेयर बजारको सचेतनाका लागि थप के के काम गर्न सकिन्छ भन्ने विषयमा पनि हाम्रो टिमले अध्ययन गरिरहेको छ।’

यता नेप्सेले सेयर बजारसम्बन्धि सचेतनाका लागि केहि हास्य कलाकारहरुलाई सहभागी गराएर टेलिफिल्म बनाउने तयारीसमेत गरेको छ । ‘हामी बजारमा चलेका केहि हास्य कलाकारहरुलाई सहभागी गराएर सेयर बजारसम्बन्धि टेलिफिल्म बनाउने योजनामा छौं । त्यसका लागि थप अध्ययनको काम भईरहेको छ । छिट्टै सेयर बजारमा बुझेर लगानी गर्नुपर्छ भन्ने आशयको रमाइलो टेलिफिल्म बजारमा आउनेछ।’ सीइओ कार्कीले भने- ‘यसका लागि आवश्यक अध्ययन र गृहकार्य भईरहेको छ ।’ उनका अनुसार नेप्सेले सेयर सचेतनाका लागि ठाउँ-ठाउँमा कन्सर्ट गर्ने योजनासमेत बनाएको छ । ‘युवा पुस्ताहरुलाई कन्सर्ट मनपर्छ । त्यसैले नेप्से आफैंले कन्सर्ट गरेर सेयर बजारसम्बन्धि सचेतना कार्यक्रम गर्ने वा आयोजना भएका अन्य कन्सर्टहरुमा नेप्से सहभागी हुने भन्ने विषयमा हाम्रो टिमले अध्ययन गरिरहेको छ । हामी यस विषयमा पनि छिट्टै निर्णयमा पुग्छौँ ।’ उनले भने ।

‘सुरुवात राम्रो भयो तर प्रक्रिया पारदर्शी भएन, आउटपुट गतिलो आएन’    
यता नेप्सेले सेयर सचेतनाका लागि राम्रो काम गरे पनि यसको प्रक्रिया पारदर्शी नभएको आरोप भने लागेको छ । नेप्सेले खुला प्रतिष्पर्धाबाट यस्ता सामाग्री निर्माणको काम गर्नुपर्ने भए पनि निश्चित रकमको कोटेसन बनाएर आफु निकट मान्छेलाई यस्ता सामाग्री बनाउन दिएको भन्दै नेप्सेकै कर्मचारीहरु असन्तुष्ट बनेका छन् ।

‘सेयर बजारमा लगानी गरौँ शीर्षकको भिडियो सामाग्री बजारमा आयो । यो आफैंमा निकै राम्रो कुरा हो । तर भिडियोमा छनोट भएका कलाकारहरु ठिक भएनन्, निर्देशन खासै गतिलो भएन भन्ने कुरा उठेको छ भने लो बजेटमा सकिने कामलाई बढी खर्च पनि भएको छ । यसतर्फ मिडियाले खबरदारी गर्नुपर्छ।’ नेप्सेकै एक उच्च अधिकारीले अर्थ सरोकारसँग भने -‘यतिको भिडियो त २५-३० हजारमा मज्जाले बन्छ भन्नेहरु पनि भेटिए । न चलेका कलाकार प्रयोग भएका छन्, न चलेका गायक गायीकाले गीत गाएका छन्, यस्तो भिडियो त २५-३० हजारमै बन्छ, हामी बनाउन सक्छौँ भनेर केहि साथीहरु आउनुभएको छ । तर नेप्सेले सुटुक्क कुनै पार्टिलाई महँगोमा सो काम दियो । कानुनी रुपमा ठिक देखिएपनि नियतमा समस्या हो कि भन्ने देखिएको छ ।’ ती कर्मचारीले भने।

यता नेप्सेका सीइओ कार्कीले पनि आउटपुटका विषयमा सन्तुष्ट हुनेगरी प्रतिक्रिया नआएको स्वीकारेका छन् । ‘प्रस्तुती अझै राम्रो हुन सक्थ्यो, धेरै कुरा मिलेन भन्ने प्रतिक्रिया थुप्रै ठाउँबाट आएको सत्य हो । पहिलो प्रयास भएकाले धेरैले ठिक छ भन्नुभएको छ । थप राम्रो काम गर्नेगरी हामी तयारी गरिरहेका छौँ । काम धेरै गर्न बाँकी छन् । अरु आउने काममा हामी धेरै कुरा सुधार्नेछौँ।’ नेप्सेका सीइओ कार्कीले अर्थ सरोकारसँग भने ।