केहि समय यता आईपीओ भर्नेको संख्या घटेको छ । एक त बुल बजारमा जस्तो अहिलेको बजारमा ‘चार्म’ नहुनु स्वाभाविक पनि हो, अर्कोतर्फ भर्यो-भर्यो, पर्दैन अनि किन भर्नु, बेकार आश्वा शुल्क मात्र स्वाहा भन्ने मनोविज्ञान हाबी हुँदा आईपीओ भर्नेको संख्या घटेको थियो । हुन पनि आश्वा शुल्कका नाममा बैंकहरुले लुट नै मच्चाएका थिए । राष्ट्रिय बाणिज्य बैंक, नबिल बैंक, एनआईसी एशिया बैंकले मात्र निशुल्क आईपीओ भर्न पाउने व्यवस्था गरेका थिए । कुमारी बैंकले केहि समय अघि मात्र सीआश्वा शुल्क खारेज गरेको छ । बाँकी बैंकहरुले १० रुपैयाँदेखि २५ रुपैयाँसम्म आश्वा शुल्क उठाउने गरेका थिए । स्ट्यान्डर्ड चार्टड बैंकले त एक पटक आईपीओ भरेको १०० रुपैयाँ लिन्थ्यो । सेयर बजारका लगानीकर्तामाथि यो हदसम्मको लुट थियो कि आईपीओ निष्कासन रकम भन्दा बढी त आश्वा शुल्क नै उठ्ने गर्थ्यो । तर लगानीकर्तामाथिको सो लुटलाई धितोपत्र बोर्डले धेरै हदसम्म कम गर्ने भएको छ । अर्थात अव एक पटक आईपीओ भर्दा बैंकहरुले बढीमा ५ रुपैयाँ शुल्क मात्र लिन पाउने भएका छन् । यो नियम ७ भदौ, २०७९ बाट लागु हुनेछ ।

गरे के नहुने रहेछ र ? कुनै बेला आश्वा शुल्क घटाउनुपर्यो भनेर लगानीकर्ताहरुले माग राख्दा धितोपत्र बोर्डको तत्कालीन नेतृव यसो गर्न बैंकले मान्दैन भनेर पन्छिन्थ्यो । सीआश्वा शुल्कका नाममा सेयर बजारमा लुट मच्चिरहँदा बोर्डका हाकिमहरु भुँडी पल्टाएर हिड्ने गर्थे, कानमा तेल हालेर बस्ने गर्थ्य । लगानीकर्तालाई चुसेर, सूचीकृत कम्पनीका मनपरी छोपेर खान पल्किएकाहरुले धितोपत्र बोर्डमा लगानीकर्ताका पक्षमा सिन्का भाँच्दैनथिए ।जहाँ-जहाँ पैसा आउँछ, त्यहि मात्र गर्थ्य । तर सेयर बजारलाई बलियो बनाउने प्रतिबद्धता गरेर बोर्डमा आएका नयाँ अध्यक्ष रमेश हमालले कुलमान शैलीमा काम गर्न थालेका छन् ।