काठमाडौँ। मर्जर तथा प्राप्तिका नाममा महिनौँसम्म सेयर कारोबार रोक्का हुने प्रवृतिको अब अन्त्य हुने भएको छ । नेपाल धितोपत्र बोर्डका अध्यक्ष रमेश हमालको विशेष पहलमा अन्तत: लगानीकर्तालाई ठूलो राहत हुने गरी मर्जर तथा एक्विजिसनमा जाने सूचीकृत संस्थाहरूको सेयर काराेबार १५ दिन मात्र रोक्का हुने भएको हो ।
नेपाल धितोपत्र बोर्डले बिहीबार सार्वजनिक गरेको संगठित संस्था एकआपसमा गाभ्ने गाभिने तथा प्राप्ति सम्बन्धी निर्देशिकाको मस्यौदामा उक्त व्यवस्था प्रस्ताव गरिएपछि लगानीकर्तालाई छिट्टै नै ठुलो राहत हुनेगरी प्रक्रिया अगाडी बढेको छ । प्रस्ताव जस्ताको त्यस्तै लागू भएमा अव बढीमा १५ दिनभित्र मर्जर तथा प्राप्तिमा जाने कम्पनीको सेयर कारोबार खुल्नेछ ।
मौद्रिक नीतिमार्फत व्यवस्था गरी नियामक नेपाल राष्ट्र बैंकले मर्जर तथा एक्विजिसनमा जाने संस्थाहरुको सेयर कारोबार रोक्ने सम्बन्धी नीतिगत व्यवस्था गर्न धितोपत्र बोर्डलाई जिम्मा दिएको थियो । बोर्डले सार्वजनिक गरेको यो मस्यौदा सुझावका लागि सार्वजनिक गरिएको हो।
‘संगठित संस्थाको नाम परिवर्तन नहुने भएमा अर्को संस्थालाई प्राप्ति गर्ने संस्थाको भने सेयर कारोबार रोक्का राख्नुपर्ने छैन,’ निर्देशिकामा भनिएको छ ।
मर्जर तथा प्राप्तिमा जाने संस्थाहरूको डिडिए रिपोर्ट गरेपछि मात्रै स्वाप रेसियोबारे निर्णय गर्नुपर्ने प्रस्ताव पनि बोर्डले मस्यौदामा राखेको छ । यसअघि पहिला नै स्वाप रेसियो फाइनल गरेर कर्मकाण्डी डिडिए हुँदै आएको थियो ।
धितोपत्र बोर्डमा सार्है आशा गरिएका रमेश हमालले एक पछि अर्को लगानीकर्ता मैत्री निर्णय गरिरहेका छन् । उनले छिट्टै नै बैंकहरुले लिने आश्वा शुल्क पनि घटाउने तयारी गरिरहेका छन् ।
