काठमाडौं । नेपाल धितोपत्र बोर्डले जारी गरेको निर्देशन विपरित सि-आश्वा शुल्क लिएको भन्दै सानिमा बैंकको चर्को विरोध भएपछि अन्तत: बैंकले सि-आश्वा शुल्क नै खारेज गरिदिएको छ । बैंकले आफ्ना सम्पूर्ण खाताहरुमा आईपीओ भर्दा लाग्ने सि–आश्वा शुल्क नलाग्ने व्यवस्था गरिएको जानकारी सार्वजनिक रुपमै दिएको हो । बैंकले एक सूचना जारी गर्दै बैंकको खाता प्रयोग गर्दा सि-आश्वा शुल्क नलिने निर्णय गरेको जानकारी गराएको हो । यस अघि सानिमा बैंकले गैरकानुनी शुल्क लिएकोबारे प्रश्न गर्दा बैंकका सीइओ निश्चल राज पाण्डेले बैंकले गैरकानुनी रुपमा उठाएको शुल्क फिर्ता गर्ने र सीआश्वा शुल्क नै खारेज गर्ने बताएका थिए । उनको प्रतिबद्धता अनुसार बैंकले उठाएको गैरकानुनी शुल्क पनि फिर्ता भएको छ भने अन्तत: सि-आश्वा शुल्क पनि खारेज भएको छ ।

अहिले धितोपत्र बोर्डले सीआश्वाका नाममा बढीमा ५ रुपैयाँ मात्र लिन पाउने व्यवस्था गरेपछि अहिले विभिन्न बैंकहरु सीआश्वा शुल्क घटाउने मुडमा पुगेका छन् । ‘अहिले बोर्डले सि-आश्वा शुल्क पाँच रुपैयाँभन्दा बढी नलिनु भनेको छ । नियामकको निर्देशन नकार्नेसमेत कुरा भएन । पाँच रुपैयाँ लिनुभन्दा नलिएर ग्राहकको मन जित्नु ठिक भन्ने कुरा धेरै साथीहरुको छ।’ एक बाणिज्य बैंकका सीइओले अर्थ सरोकारसँग भने – ‘सायद अव धेरै बैंकहरुले सीआश्वा शुल्क खारेज गर्नेछन् । हामी पनि खारेज गर्ने मुडमा छौँ ।’ उनका अनुसार अव ढिलोचाँडो केहि बैंकलाई छोडेर अधिकांस बैंकले सि-आस्वा शुल्क लिनै छोड्नेछन् ।