काठमाडौं । कोरोना भाइरस संक्रमणको कारण देखाउँदै चीनले गरेको नाकाबन्दी बिहीबारबाट खुल्ने भएको छ । बुधबार चिनियाँ पक्षबाट रसुवागढी नाका सञ्चालनको जानकारी आएको जिल्ला प्रशासन कार्यालय रसुवाले जनाएको छ । नेपाल भ्रमणमा रहेका जनकंग्रेसका अध्यक्ष ली चान्सुले राष्ट्रपतिसँगको भेतवार्तामा नाका खोल्नेबारे जानकारी गराएका थिए ।
‘चिनियाँ पक्षबाट नाका सञ्चालनको जानकारी आएको छ । लामो समयदेखि नाका सञ्चालनमा रहेको अन्योलता हटेको छ । अव नाका सञ्चालन हुन्छ ।’ जिल्ला प्रशासन कार्यालय रसुवाका सिडीओ नवराज जैशीले भने -‘यो सँगै अव दैनिक १४ वटा कन्टेनर नेपाल प्रवेश हुनेछन् । व्यापारीहरुले चाडपर्व र चिसोलाई लक्षित गरी ल्याएर नाकामा रोकिएका सामान अव निकासा हुनेछन् ।’
चिनियाँ पक्षको जानकारी आएसँगै आजबाट रसुवागढी नाका सञ्चालन हुने भएको छ । तर, तातोपानी नाका सञ्चालनको विषयमा भन अझै अन्योल कायमै छ । साउन २५ गतेसम्म चिनबाट केही कन्टेनर नेपाल आएको भएपछि त्यसप्रश्चात भने नाका ठप्प प्रायः बनेको जिल्ला प्रशासन कार्यालय सिन्धुपाल्चोकका प्रमुख जिल्ला अधिकारी वेदनिधि खनालले बताएका छन् ।
‘चीन तर्फका सम्पूर्ण नाका खोल्ने भन्ने कुरा आएको हो । तर, अहिले नाका बन्द नै छ । सञ्चालन हुने भन्ने विषयमा कुनै आधिकारिक जानकारी आएको छैन’, सीडिओ खनालले भने, ‘नेतृत्वबाटै आधिकारिक रुपमा जानकारी आए नाका सञ्चालन हुन्छ । अहिले चिनियाँ पक्षबाट पनि जानकारी आएको छैन ।’
चीनको तिब्बततर्फ कोरोना संक्रमण बढेको भन्दै २५ साउनदेखि चिनियाँपक्षले नाकाबन्दी गरेको थियो । अघोषित रुपमा नाकाबन्दी हुँदा दशैंको मुखमा अर्बौ मुल्य बराबरको सामान नाकामै अड्किएको थियो । व्यापार गर्नुपर्ने समयमा सामान नाकामै रोकिएपछि चिन्तामा परेका व्यापारी नाका खुल्ने खबरसँगै केही उत्साहित बनेका छन् ।
‘नाका बन्द हुँदा ठूलो रकमको सामान नाकामै अड्कियो । व्यापार गर्नुपर्ने बेला हुँदापनि सामान छैन ।’ एक व्यापारीले अर्थ सरोकारसँग भने –‘अव नाका खुल्छ भन्ने जानकारी पाएका छौँ, खुल्यो भने व्यापारीलाई ठूलो राहत महशुस हुन्थ्यो । कमसेकम बचेको केही समय राम्रोसँग व्यापार गर्न पाउछौँ । दशैँमा पनि व्यापार गर्न नपाए त विस्थापित हुनुको विकल्प नै थिएन र छैन पनि ।’
