काठमाडौं । स्वास्थ्य सेवा सुधारका लागि अनशन बसेका डा. गोविन्द केसीले १३ औँ दिनमा अनशन तोडेका छन् । शनिबार त्रिवि शिक्षण अस्पतालमा सरकारसँग १० बुँदे सहमति भएसँगै केसीले अनशन तोडेका हुन् ।

१० बुँदे सहमति पत्रमा हस्ताक्षर गर्दै केसीले सरकारले माग पुरा गर्नेमा विश्वास व्यक्त गरे । उनले शिक्षण अस्पतालमै उपचाररत सरिता चौधरीको हातबाट जुस पिएर अनशन तोडेका हुन् । सहमतिपत्रमा सरकारका तर्फबाट प्रधानमन्त्री तथा मन्त्रिपरिषद् कार्यालयका सचिव गणेश पाण्डेय र अनशनरत पक्षबाट डा. केसीले हस्ताक्षर गरेका छन् ।

डा. केसीको माग अनुसार सरकारी अस्पतालको स्वास्थ्य सेवा सुधार गर्न हाल कायम रहेको चिकित्सकको दरबन्दी थप गर्ने सर्तमा सरकार तयार भएको छ । त्यसका लागि ५०० शैयाको अस्पतालहरुको संगठन तथा व्यवस्थापन सर्वेक्षणको काम सम्पन्न गरी शीघ्र स्वीकृतिको प्रक्रियामा लैजाने सहमति भएको छ । त्यस्तै अन्य सरकारी अस्पतालको पनि संगठन तथा व्यवस्थापन सर्वेक्षणको काम छिटो सक्ने सरकारले सहमति जनाएको छ ।

त्यस्तै सबै सरकारी अस्पतालमा आकस्मिक सेवा निःशुल्क गर्न सरकार तयार भएको छ । शनिबार डा. केसीसँग भएको सहमति अव सरकारले क्याबिनेटमा पेश गर्नेछ । सहमति अनुसार आगामी सात दिनमा कार्यान्वयन नभए पुनः अनशन जारी गर्ने चेतावनी दिएका छन् ।

यस्तो छ त्रिवि शिक्षण अस्पतालमा भएको सहमतिका केही झलकहरुः