काठमाडौं । काठमाडौं महानगरपालिकाले घर तथा भवनको नक्सा पास गर्नका लागि ९० दिनको समय दिएको छ । एक सूचना जारी गर्दै महानगरपालिकाले महानगर क्षेत्रभित्र नक्सा पास नगरी बनाइएका घर तथा भवनको नक्सा पास ९० दिनभित्र गरिसक्न आग्रह गरेको हो ।
महानगर क्षेत्रमा निर्माण गरिएका सरकारी, संस्थागत, निजी वा जुनसुकै प्रकृतिको भवनको समेत नक्सा पास गर्न सूचना मार्फत अपिल गरेको महानगरको शहरी व्यवस्थापन विभागले जनाएको छ । नक्सा पास नभएका घर तथा भवनले सूचना जारी भएको मितिदेखि ९० दिनभित्रमा नक्सा पास गर्नुपर्नेछ । ‘तोकिएको समयभित्र नक्सा पेस नगरेमा त्यस्ता भवनहरुको विवरण संकलन गरी स्थानीय सरकार सञ्चालन ऐन, २०७४ र प्रचलित भवन निर्माण सम्बन्धी मापदण्ड, संहिता, कार्यविधि र यस कार्यालयको निर्णय बमोजिम कार्वाही हुनेछ ।’ -सूचनामा उल्लेख गरिएको छ ।
यस्तै, महानगरले घरको सीमा पर्खालको नक्सा पास गर्न पनि अपिल गरेको छ । नक्साविनै बनाइएका सीमा पर्खाल (कम्पाउन्ड वाल) ३५ दिनभित्र भत्काउन पनि महानगरले आग्रह गरेको छ । अनाधिकृत रुपमा बनाइएका सीमा पर्खाल सूचना जारी भएको ३५ दिनभित्र भत्काउनुपर्नेछ । घरधनिले नभत्काए महानगरपालिकाले भत्काउने चेतावनी दिइएको छ ।
जुनसुकै प्रकृतिको घरजग्गा घेर्न निर्माण गरिने सीमा पर्खालको नक्सा पेश गरी प्रचलित कानूनअनुसार नक्सा पास भएपछि मात्र त्यस्तो सीमा पर्खाल लगाउन महानगरले आग्रह गरेको छ ।
