काठमाडौं । टुकुचा खोला मिचेर बनाइएका संरचना नभत्काउन उच्च अदालतले अन्तरकालीन आदेश जारी गरेको छ । आइतबार उच्च अदालतमा परेको रिट निवेदनमाथि सुनुवाई गर्दै न्यायधिश दिपेन्द्र बहादुर बमको इजलासले यस्तो आदेश जारी गरेको हो ।

टुकुचा खोला खोज्न काठमाडौं महानगरपालिकाले उत्खनन् सुरु गरेसँगै हालसम्म जय नेपाल हालको आँगन र लक्ष्मी बैंक रहेको भवनमुनी गायब भएको खोला भेटिएको छ । यो सँगै संरचना भत्किने डरले प्रेसिडेन्ट ट्राभल्स एण्ड टुर्स प्रालिको तर्फबाट भोलाविक्रम थापा समेतले उच्च अदालत पाटनमा रिट निवेदन दायर गरेका थिए । सोही रिटमाथि सुनुवाई गर्दै अदालतले महानगरलाई खोला मिचेर बनाइएका संरचना तत्काल नभत्काउने आदेश जारी गरेको हो ।

उच्च अदालत पाटनका रजिस्ट्रार ठगिन्द्र कट्टेलका अनुसार प्रक्रिया बमोजिम नक्सा पास गरेको र निर्माण सम्पन्नको प्रमाणपत्र समेत लिएको देखिएकाले तत्काल संरचना नभत्काउन अन्तरकालीन आदेश जारी गरेको हो । अदालतले दुवै पक्षलाई असोज पाँच गते छलफलका लागि बोलाएको छ ।