काठमाडौं । देशभर बढ्दो बैंक ब्याजदरको विरोधमा आन्दोलन चर्किएको छ । बिहीबार भैरहवाका व्यवसायीहरुले पनि चर्को ब्याजदर र बैंकको नीतिको विरोध गर्दै प्रदर्शन गरेका छन् । राष्ट्र बैंक र बैंकहरुको नीति व्यवसायीहरुको हित विपरित भएको भन्दै उद्योगी व्यवसायीहरु सडकमा उत्रिएका हुन् ।

बैंकहरुले आफुखुसी ब्याज बढाएर व्यवसायीलाई मर्कामा पारेको भन्दै कालोपट्टीसहित प्रदर्श गरिएको रुपन्देही उद्योग वाणिज्य संघका वरिष्ठ उपाध्यक्ष दिनेशप्रसाद श्रेष्ठले बताएका छन् । ‘राष्ट्र बैंक र बैंकहरुको नीतिले व्यवसायीलाई पलायनको बाटो देखाएको छ । व्यवसायीहरुप्रति राज्य गम्भिर देखिएन’, उनले भने, ‘बैंकहरुले आफुखुसी ब्याज बढाउँदा पनि नियामक निकाय मौन छ । हाम्रो आन्दोलन बैंक र नियामकको नीतिको विरोधमा हो ।’

‘बढ्दो ब्याजदर र बैंकहरुको नीतिको विरोधमा आज एक घण्टा कालोपट्टीसहित सडकमा प्रर्दशन गर्यौं,’ श्रेष्ठले भने, ‘प्रदर्शनसँगै राष्ट्र बैंक भैरहवा कार्यालयमा ज्ञापन पत्र बुझाएका छौँ । माग सम्बोधन नभए आन्दोलनलाई थप सशक्त बनाउनेछौँ ।’

पछिल्लो समय बैंकहरुले बढाएको ब्याजदरको विरोधमा देशभरका विभिन्न ठाउँमा आन्दोलन चर्किएको छ । केहिदिन अघिमात्रै सुर्खेतका व्यवसायीहरुले बैंक बहिष्कार अभियान नै चलाएका थिए ।