काठमाडौं । कार्तिक महिनामा बैंकहरुको ब्याजदर नबढ्ने भएको छ । नेपाल बैंकर्स संघको बिहिबार बसेको अनौपचारिक वैठकले कार्तिक महिनामा निक्षेपको ब्याज बढाउन उचित नहुने निष्कर्ष निकालेको थियो ।

असोज महिनामा बैंकहरुले ब्याजदर बढाएपछि त्यसको चौतर्फी आलोचाना हुँदै आएको थियो । ‘चौतर्फी विरोध भएपछि बैंकर्स संघको बिहिबार बसेको बैठकले तत्काल ब्याज बढाउन नहुने निष्कर्ष निकालेको एक बैंकरले जानकारी दिए ।

निक्षेपको ब्याजदर असोजको लागि भने  व्यक्तिगत मुद्दतीतर्फ नै ११.०३ प्रतिशतबाट बढेर १२.१३ प्रतिशत पुर्‍याइएको थियो । अब कात्तिक महिनामा पनि यही दर कायम रहने भएको छ । रेमिट्यान्स मुद्दतीको १३.१३ प्रतिशत न्यूनतम ब्याजदर कायमै रहनेछ ।

ब्याजदर बढाएकै भरमा निक्षेप नथपिने र अहिले बढाएको ब्याजदरले बढेको लागत आउँदो माघदेखि मात्र ब्याजदरमा जोड्न पाइने भएकाले कात्तिकमा ब्याजदर स्थिर राख्ने निष्कर्षमा बैंकहरू पुगेका हुन् ।