काठमाडौं । मुक्तिनाथ विकास बैंकले चालु आर्थिक वर्षको पहिलो त्रैमाससम्मको अपरिष्कृत वित्तीय विवरण सार्वजनिक गरेको छ । बैंकले सार्वजनिक गरेको वित्तीय विवरण अनुसार समिक्षा अवधिमा बैंकको खुद नाफा ११.०५ प्रतिशतले घटेको छ ।
अघिल्लो वर्षको सोही अवधिमा बैंकले ३४ करोड ५५ लाख ८७ हजार रुपैयाँ नाफा कमाएको थियो भने यसवर्ष बैंकको खुद नाफा ३० करोड ७४ लाख १५ हजार रुपैयाँमा सीमित भएको छ । एक वर्षको अवधिमा बैंकको इम्पेरिमेन्ट चार्ज बढेकाले र सञ्चालन नाफा घटेकाले खुद नाफा प्रभावित भएको हो ।
समिक्षा अवधिसम्म बैंकको सञ्चालन नाफामा पनि ११.०५ प्रतिशतले गिरावट आएको छ । यो अवधिमा बैंकको यस्तो नाफा घटेर ४३ करोड ९१ लाख रुपैयाँमा कायम भएको छ । त्यस्तै, चालु आर्थिक वर्षको पहिलो त्रैमाससम्ममा बैंकको इम्परिमेन्ट चार्ज भने बढेको छ । गत वर्ष १७ करोड ४८ लाख रुपैयाँ रहेको इम्पेरिमेन्ट चार्ज यो वर्ष बढेर २५ करोड १ लाख रुपैयाँ पुगेको हो ।
बैंकले सार्वजनिक गरेको वित्तीय विवरणका अनुसार समिक्षा अवधिमा बैंकको खुद ब्याज आम्दानी भने २२.२४ प्रतिशतले वृद्धि भएको छ । त्यस्तै बैंकको वितरणयोग्य नाफा ८१ करोड ४७ लाख रुपैयाँ रहेको छ भने जगेडा कोषमा १ अर्ब ९५ करोड रुपैयाँ जम्मा भएको छ । हाल मुक्तिनाथ विकास बैंकको चुक्ता पुँजी ५ अर्ब ६५ करोड ७१ लाख ८० हजार रुपैयाँ रहेको छ ।
पहिलो त्रैमासम्ममा बैंकको खुद नाफासँगै प्रतिसेयर आम्दानी (इपीएस)मा पनि गिरावट आएको छ । सो अवधिमा बैंकको यस्तो आम्दानी २ रुपैयाँ ७० पैसाले घटेर २१ रुपैयाँ ७४ पैसा कायम भएको छ । हाल कम्पनीको प्रतिसेयर नेटवर्थ १४८ रुपैयाँ ५८ पैसा रहेको छ ।
