काठमाडौं । तिहारलाई लक्षित गर्दै नेपालमा ओखरको आयात ह्वात्तै बढेको छ । दशैं सकिए लगत्तै उत्तरी नाकाबाट ओखर तथा स्याउको आयात बढेको हो । दशैं अघिसम्म न्युन मात्रामा आयात भईरहेको दाँते ओखरको आयात तिहार नजिकिएसँगै ह्वात्तै बढेको रसुवा भन्सार कार्यालयले जनाएको छ ।

दसैं सकिएलगत्तै चार दिनको समयमा २६ कन्टेनर ओखर र १८ कन्टेनर स्याउ रसुवागढी नाकाबाट नेपाल भित्रिएको छ । यसरी नेपालीहरुको दोस्रो ठूलो महान चार्ड तिहार नजिकिएसँगै स्याउसँगै ओखरको आयातमा वृद्धि भएको व्यवसायीहरु बताउँछन् । ‘ओखरको खपत हुने भनेकै तिहारमा हो’, व्यवसायी क्षितिज श्रेष्ठले भने, ‘चीनबाट अहिले सबैभन्दा बढी ओखर र स्याउकै आयात बढी छ ।’

यसो त अहिले नेपाली बजारमा ओखरको मूल्य प्रतिकिलो १ हजार ५० सम्म पर्छ । तर, ठूलो मात्रामा ओखरको आयात भएसँगै केही दिनमा ओखर तथा स्याउ खरिदको मूल्य सर्वसुलभ हुने व्यवसायीहरुको भनाई रहेको छ ।

चिनियाँ नाकामा भएको अघोषित नाकाबन्दीमा केही सहज भएसँगै अहिले आयातमा पनि वृद्धि देखिएको छ । सोही अनुरुप चालु आर्थिक वर्षको गत साउनदेखि असोज २७ गतेसम्म आयात भएका सामग्रीको मूल्याङ्कनबाट कुल १ अर्ब ४१ करोड भन्सार शुल्कवापत राजस्व दाखिला भइसकेको प्रमुख भन्सार अधिकृत नारायणप्रसाद भण्डारीले जानकारी दिएका छन् ।